ශ්‍රී ලංකා මුහුදු සීමාවෙන් පිටත ඉන්දියානු සාගරයේදී IRIS Dena නෞකාව ගිල්වීමෙන් නාවිකයන් දුසිම් ගණනක් ඝාතනය කිරීම සම්බන්ධයෙන් සතුරන්ට පළිගැනීමකට මුහුණ දෙනු ඇති බව ඉරාන නාවික හමුදාපති ෂාරාම් ඉරානි අනතුරු අඟවයි.

“අපි සතුරාගේ අපරාධය අමතක කරන්නේ නැහැ, අපගේ දිවි පිදූවන්ගේ රුධිරයට අපි පළිගන්නවා,” යනුවෙන් ඉරානි ඉංග්‍රීසි භාෂාවෙන් ප්‍රකාශ කිරීම එරට ඉංග්‍රීසි භාෂා විකාශක ප්‍රෙස් ටීවී විසින් විකාශය කර තිබිණි.

“අවම වශයෙන් අපේක්ෂා කරන තැනකින් මාරාන්තික ප්‍රහාර ඔස්සේ අපි එයට දඬුවම් කරන බව සතුරා දැනගත යුතුයි,” යනුවෙන් ඔහු පැවසීය.

ඉන්දියාව සමඟ ඒකාබද්ධ නාවික අභ්‍යාසයකින් පසු අන්තර්ජාතික මුහුදේ යාත්‍රා කරමින් සිටියදී ගාලු වෙරළට ඔබ්බෙන් ඇමරිකානු සබ්මැරීන් ටෝපිඩෝවකින් IRIS Dena නෞකාව මාර්තු 4 වැනිදා ගිල්වා දැමූ අතර එහිදී අවම වශයෙන් නැවියන් 87 දෙනෙකු මියගොස් තිබිණි.

තිස් දෙදෙනෙකු බේරා ගන්නා ලද අතර තවත් කිහිප දෙනෙකු අතුරුදහන් වී ඇත.