ඉන්දියාවේ මිලාන් නාවික අභ්‍යාසයට සහභාගී වීමට ආරාධනා නොකළේ නම් ශ්‍රී ලංකා වෙරළට ඔබ්බෙන් ඇමරිකානු සබ්මැරීන ප්‍රහාරයකට ලක් වූ ඉරාන නෞකාව මෙම මුහුදු කලාපයට නොඑනු ඇතැයි හිටපු ඉන්දීය විදේශ ලේකම් කන්වාල් සිබල් පවසා තිබේ.

“අපි සත්කාරකයන්. මෙම අභ්‍යාසයේ ප්‍රොටෝකෝලය අනුව, නැව්වලට කිසිදු පතොරම් රැගෙන යා නොහැකියි. එය අනාරක්ෂිත විය. ඉරාන නාවික නිලධාරීන් අපගේ ජනාධිපතිවරයා ඉදිරියේ පෙළපාළි ගොස් තිබිණි,” ඔහු සඳහන් කරයි.

ප්‍රහාරය කලින් සැලසුම් කළ එකක් බව සිබල් සඳහන් කරන අතර, එක්සත් ජනපද නාවික හමුදාවට අභ්‍යාසයට ආරාධනා කර ඇති නමුත් අවසාන මොහොතේ ඔවුන් ඉන් ඉවත් වූ බව ඔහු පෙන්වාදෙයි.

ඉන්දියාවේ ආරාධනය හේතුවෙන් ඉරාන නෞකාව මෙම සාගර කලාපයට පැමිණි බැවින්, එක්සත් ජනපදය ‘ඉන්දියාවේ සංවේදීතාව’ නොසලකා හැර ඇති බව ඔහු තවදුරටත් පැවසීය.

එක්සත් ජනපද ප්‍රහාරයට ඉන්දියාව දේශපාලනිකව හෝ මිලිටරිමය වශයෙන් වගකිව යුතු නොවන බවත්, සදාචාරාත්මක හා මානුෂීය වගකීමක් පමණක් දරන බවත් ඔහු අවධාරණය කරයි.

“අපගේ ආරාධිතයන් වූ සහ අපගේ ජනාධිපතිවරයාට ආචාර කළ අයගේ ජීවිත අහිමි වීම සම්බන්ධයෙන් (දේශපාලන අවසරයෙන් පසු) ඉන්දීය නාවික හමුදාවෙන් ශෝකය පළකිරීමේ වචනයක් පැවසීම සුදුසු වනු ඇත,” ඔහු වැඩිදුරටත් පවසයි.