ශ්‍රී ලංකාවේ දකුණු වෙරළට ඔබ්බෙන් වූ ඉරාන නෞකාවකට එල්ල වූ සැකසහිත සබ්මැරීන් ප්‍රහාරයකින් අවම වශයෙන් පුද්ගලයින් 101 දෙනෙකු අතුරුදහන් වී ඇති අතර තවත් 78 දෙනෙකු තුවාල ලබා ඇති බව ශ්‍රී ලංකා නාවික හමුදාවේ සහ ආරක්ෂක අමාත්‍යාංශයේ ආරංචි මාර්ග උපුටා දක්වමින් රොයිටර් පුවත් සේවය වාර්තා කරයි.

ගාල්ල වෙරළට නාවික සැතපුම් 40 ක් පමණ දුරින් මෙම ඉරාන නාවික හමුදාවේ ‘IRIS Dena’ නෞකාවෙන් ආපදා ඇමතුමක් ලැබීමෙන් පසු ශ්‍රී ලංකා නාවික යාත්‍රා බේරාගැනීමේ මෙහෙයුම් වේ නුවෙන් පිටත් කර ඇත.

තුවාල ලැබූ ඉරාන නාවික භටයන් 32ක් බේරාගෙන ගොඩබිමට ගෙන ආ බව බලධාරීන් මීට පෙර තහවුරු කළ අතර, ඔවුන් ප්‍රතිකාර සඳහා කරාපිටිය ශික්ෂණ රෝහලට ඇතුළත් කර ඇත.

රෝහල් නිලධාරීන් පැවසුවේ, එක් අයෙකුගේ තත්ත්වය බරපතල බවත් තවත් කිහිපදෙනෙකුට මධ්‍යස්ථ හා සුළු තුවාල සිදුවී ඇති බවත්ය.

මේ අතර, තවමත් මුහුදේ සිටින අය සොයා ගැනීමට සහ ඔවුන්ට උපකාර කිරීමට උත්සාහ කිරීම දිගටම කරගෙන යන බැවින් ශ්‍රී ලංකා නාවික හමුදා යාත්‍රා තවමත් ගලවා ගැනීමේ මෙහෙයුම්වල නිරත වේ.

කෙසේ වෙතත්, සබ්මැරීන් ප්‍රහාරයක් පිළිබඳ වාර්තා හෝ අතුරුදහන් වූ සංඛ්‍යාව තහවුරු කරන නිල ප්‍රකාශයක් ශ්‍රී ලංකා බලධාරීන් තවමත් නිකුත් කර නොමැත.

ශ්‍රී ලංකා නාවික හමුදාවේ සහ ආරක්ෂක අමාත්‍යාංශයේ මූලාශ්‍ර මත පදනම්ව මෙම තොරතුරු ලැබුණු බව රොයිටර් පුවත් සේවය පවසයි.