පාස්කු ඉරිදා ප්‍රහාර සම්බන්ධයෙන් පත්කළ ජනාධිපති කොමිසම විසින් වගකිව යුතු බවට තීරණය කරන ලද පුද්ගලයන්ට එරෙහිව පරීක්ෂණ ආරම්භ කරන ලෙස නීතිපතිවරයා අපරාධ පරීක්ෂණ දෙපාර්තමේන්තුවට නියෝග කර තිබේ.

ඒ අනුව, කොමිසමේ නිර්දේශ අධ්‍යයනය කර පියවර ගන්නා ලෙස අපරාධ පරීක්ෂණ දෙපාර්තමේන්තුවට නියෝග කර ඇත.

කොමිසම විසින් නම් කරන ලද අය අතර එවක ජනාධිපති මෛත්‍රීපාල සිරිසේන, එවක අගමැති රනිල් වික්‍රමසිංහ, එවක ආරක්ෂක ලේකම් හේමසිරි ප්‍රනාන්දු, එවක පොලිස්පති පූජිත් ජයසුන්දර සහ එවක ජ්‍යෙෂ්ඨ පොලිස් නිලධාරීන් වන සිසිර මෙන්ඩිස්, නිලන්ත ජයවර්ධන, නන්දන මුණසිංහ, ලලිත් පතිනායක, දේශබන්දු තෙන්නකෝන්, වසන්ත වික්‍රමසිංහ, ජී.ඕ. පෙරේරා සහ එම්.ආර්. ලතීෆ් යන අය සිටිති.

අපරාධ පරීක්ෂණ දෙපාර්තමේන්තුවේ අධ්‍යක්ෂ ශානි අබේසේකරට උපදෙස් දුන් ලිපියට අතිරේක සොලිසිටර් ජනරාල් දිලීප පීරිස් සහ නියෝජ්‍ය සොලිසිටර් ජනරාල් මාධව තෙන්නකෝන් යන අය අත්සන් තබා ඇත.

ජනාධිපති කොමිසමේ ප්‍රධානියා ලෙස කටයුතු කළේ විනිසුරු ජනක් ද සිල්වාය.

එම ලිපියෙන් අපරාධ පරීක්ෂණ දෙපාර්තමේන්තුවට උපදෙස් දෙන්නේ විමර්ශන සිදුකර වැඩිදුර උපදෙස් සඳහා එහි වාර්තාව ඉදිරිපත් කරන ලෙසයි.