මැදපෙරදිග වේගයෙන් අර්බුදයට ලක්වන ආරක්ෂක තත්ත්වය සමීපව නිරීක්ෂණය කරමින් සිටින බව ශ්‍රී ලංකාවේ විදේශ කටයුතු, විදේශ රැකියා සහ සංචාරක අමාත්‍යාංශය පවසයි.

කලාපයේ පදිංචිව සිටින සහ සේවය කරන මිලියනයක් පමණ වන ශ්‍රී ලාංකිකයන්ගේ ආරක්ෂාව සහ යහපැවැත්ම රජයේ ඉහළම ප්‍රමුඛතාවය ලෙස පවතින බව අද (28) විශේෂ ප්‍රකාශයක් නිකුත් කරමින් අමාත්යංශය පැවසීය.

ඒ අනුව, වර්තමානයේ කලාපීය අස්ථාවරත්වය සැලකිල්ලට ගනිමින්, මැදපෙරදිග කලාපයේ සියලුම ශ්‍රී ලාංකික පුරවැසියන්ට පහත සඳහන් ආරක්ෂක මාර්ගෝපදේශ පිළිපැදීමට දැඩි ලෙස උපදෙස් දෙනු ලැබේ:

– දැනුවත්ව සිටින්න: ඔබේ සත්කාරක රට තුළ දේශීය ප්‍රවෘත්ති ආයතන සහ නිල රජයේ නිවේදන නිතිපතා නිරීක්ෂණය කරන්න.

– ප්‍රවේශම් වන්න: අත්‍යවශ්‍ය නොවන සංචාරවලින් වළකින්න, විශේෂයෙන් දේශසීමා ප්‍රදේශ හෝ හමුදා ක්‍රියාකාරකම්වලට ගොදුරුවන ප්‍රදේශ වෙත නොයන්න. විශාල මහජන රැස්වීම් විරෝධතා ස්ථාන, දේශසීමා ප්‍රදේශ සහ හමුදා වැදගත්කමක් ඇති ස්ථානවලින් ඉවත්වන්න.

– සන්නිවේදනය පවත්වා ගන්න: ළඟම ඇති ශ්‍රී ලංකා රාජ්‍ය තාන්ත්‍රික දූත මණ්ඩලය සමඟ නිරන්තර සම්බන්ධතා පවත්වා ගන්න. ජංගම උපාංග ආරෝපණය කර ඇති බවට සහතික කරගන්න, එසේම සෑම විටම හැඳුනුම්පතේ භෞතික පිටපත් (විදේශ ගමන් බලපත්‍රය/ජාතික හැඳුනුම්පත) රැගෙන යන්න.

ශ්‍රී ලංකාවේ සියලුම රාජ්‍ය තාන්ත්‍රික දූත මණ්ඩලවලට, ප්‍රජාවට සෘජු සහාය ලබාදීම සඳහා 24/7 හදිසි දුරකථන අංක ක්‍රියාත්මක කරන ලෙස උපදෙස් දී ඇති බව අමාත්‍යාංශයේ ප්‍රකාශකවරයා වැඩිදුරටත් පැවසීය.

තවද, මැද පෙරදිග සිටින ඔවුන්ගේ ඥාතීන් සම්බන්ධයෙන් සහය ලබාගැනීම සඳහා ශ්‍රී ලංකාවේ පවුල් වෙනුවෙන් කැපවූ සම්බන්ධතා අංක ඉක්මනින් ප්‍රසිද්ධ කරනු ඇති බව එහි සඳහන් වේ.

විදේශ කටයුතු අමාත්‍යාංශය පැවසුවේ මැදපෙරදිග කලාපයේ සියලුම ශ්‍රී ලංකා රාජ්‍යතාන්ත්‍රික දූත මණ්ඩල සමඟ සමීප සම්බන්ධතා පවත්වන බවත්, පවතින තත්වයන් නිරීක්ෂණය කරන බවත්, ඉදිරියටත් ඒ සම්බන්ධයෙන් කටයුතු කරන බවත්ය.

ශ්‍රී ලංකා දූත මණ්ඩල විසින් ජනතාවට දූත මණ්ඩලය හා සම්බන්ධ වීමට සහ හදිසි අවශ්‍යතා ඇති වුවහොත් සම්බන්ධතා පවත්වා ගැනීමට හැකි වන පරිදි හදිසි දුරකථන අංක පිහිටුවා ඇත.

මැදපෙරදිග සිටින තම ඥාතීන් සම්බන්ධයෙන් සහය ලබාගැනීම සඳහා ශ්‍රී ලංකාවේ පවුල් සඳහා පහත සඳහන් විශේෂිත සම්බන්ධතා අංක ශ්‍රී ලංකා විදේශ සේවා නියුක්ති කාර්යාංශය (SLBFE) නිකුත් කර ඇත: +94 71 980 2822