බාල ගල් අඟුරු ආනයනය කිරීම සම්බන්ධයෙන් සමගි ජන බලවේගයේ මන්ත්‍රීවරුන් පිරිසක් විසින් අල්ලස් හෝ දූෂණ චෝදනා විමර්ශන කොමිසමට ඊයේ (26) පැමිණිල්ලක් ගොනු කර තිබේ.

මෙම පැමිණිල්ල ඉදිරිපත් කිරීම සඳහා සමගි ජන බලවේගයේ මන්ත්‍රීවරුන් වන මුජිබර් රහ්මාන්, චමින්ද විජේසිරි, සුජිත් සංජය පෙරේරා සහ කවින්ද ජයවර්ධන අල්ලස් කොමිසමට පැමිණ තිබිණි.

පැමිණිල්ල ගොනු කිරීමෙන් පසු පාර්ලිමේන්තු මන්ත්‍රී මුජිබර් රහ්මාන් මාධ්‍ය වෙත පැවසුවේ අදාළ සමාගම ප්‍රධාන කොන්දේසි දෙකක් උල්ලංඝනය කර ඇති බවයි.

පළමුව, බාල ගල් අඟුරු ශ්‍රී ලංකාවට යැවීම සහ දෙවනුව, නියමිත කාල රාමුව තුළ ගල් අඟුරු ලබා දීමට අපොහොසත් වීම එම උල්ලංඝනයන් ලෙස ඔහු පෙන්වා දුන්නේය.

මෙම ප්‍රධාන කොන්දේසි දෙක උල්ලංඝනය කිරීම අදාළ ගිවිසුම අවලංගු කිරීමට ප්‍රමාණවත් වුවත් එය වංචාවක් නොවන බව පවසමින් රජය එය සාධාරණීකරණය කිරීමට උත්සාහ කරන බව ඔහු පැවසීය.

කෙසේවෙතත්, පාර්ලිමේන්තු මන්ත්‍රී මුජිබර් රහ්මාන් අවධාරණය කළේ එය එසේ සාධාරණීකරණය කළ නොහැකි අතර මේ වන විට ගනුදෙනුව දූෂිත බව හෙළි වී ඇති බවයි.

පසුගිය රජයට එරෙහිව ලැබුණු පැමිණිලි අල්ලස් කොමිසම පුළුල් ලෙස විමර්ශනය කර ඇති බැවින්, වත්මන් රජයේ වංචාව හේතුවෙන් ජනතාවට අහිමි වූ රුපියල් මිලියන 7,000ක බදු මුදල් අයකර ගැනීමට ද පියවර ගත යුතු බව ඔහු වැඩිදුරටත් පැවසීය.