ඇල්පිටිය, බටුවන්හේන, පොල්ගස්වත්ත ප්‍රදේශයේදී අද (26) පෙ.ව 11.00 ට පමණ සහෝදරයන් දෙදෙනෙකු අතර ඇති වූ පෞද්ගලික ආරවුලක් මාරාන්තික පහරදීමකින් අවසන් වී ඇති බව පොලිසිය පවසයි.

වින්දිතයා වන 73 හැවිරිදි පුද්ගලයා, ඔහුගේ වැඩිමහල් සහෝදරයා සමග ඇතිකර ගත් ඇති වූ ආරවුලකින් පසුව, මුගුරකින් පහරකෑමෙන් මියගොස් ඇති බව වාර්තා වේ.

පොලිසියට අනුව, සහෝදර සහෝදරයන් දෙදෙනාගේම නිවාස අපරාධය සිදු වූ ස්ථානයට ආසන්නයේ පිහිටා ඇත.

මිනින්දෝරුවරුන් ඉඩමට මිනුම් කටයුතු සිදුකිරීම සඳහා පැමිණ ඔවුන්ගේ රාජකාරි අවසන් කිරීමෙන් පසු ආරවුල ඇති වී ඇති බව වාර්තා වේ.

පසුව සහෝදරයන් දෙදෙනා අතර ඇති වූ බහින්බස්වීමක් උත්සන්න වී ඇති අතර එය ප්‍රහාරයට හේතුවී ඇත.

ප්‍රහාරයෙන් පසු බාල සහෝදරයා බිම වැටී ඇති අතර, පවුලේ සාමාජිකයන් ඔහුව ඇල්පිටිය මූලික රෝහලට ඇතුළත් කරන ලද නමුත් එහිදී ඔහු මියගොස් ඇති බව පොලිසිය පැවසීය.

මියගිය පුද්ගලයා 73 හැවිරිදි පස්දරු පියකු ලෙස හඳුනාගෙන තිබේ.

සිද්ධිය සම්බන්ධයෙන් සැකකරු අත්අඩංගුවට ගැනීම සඳහා ඇල්පිටිය පොලිසිය පරීක්ෂණ ආරම්භ කර තිබේ.