ශ්‍රී ලංකා කාන්තා ක්‍රිකට් කණ්ඩායම ඊයේ (22) පැවති දෙවැනි එක්දින තරගයේදී බටහිර ඉන්දීය කොදෙව් කාන්තා කණ්ඩායම ලකුණු 14කින් පරාජය කරමින් කැරිබියන් දූපත්හි ඓතිහාසික එක්දින තරගමාලා ජයග්‍රහණයක් අත්කර ගනිමින් තරගාවලිය 2-0ක් ලෙස පෙරමුණ ගැනීමට සමත් වී තිබේ.
චමරි අතපත්තුගේ නායකත්වයෙන් යුත් ශ්‍රී ලංකාව ලකුණු 208ක් රැස් කළ අතර, විශ්මි ගුණරත්න ලකුණු 58ක් රැස් කළාය.

ඉනෝකා රණවීර සහ සුගන්දිකා කුමාරි කඩුලු 3 බැගින් දවා ගැනීමත් සමඟ සත්කාරක බටහිර ඉන්දීය කොදෙව් කාන්තා කණ්ඩායම ඕවර 48කදී ලකුණු 194කට දැවී ගියේය.

සිකුරාදා (20) පැවති පළමු එක්දින තරගයේදී ශ්‍රී ලංකාව බටහිර ඉන්දීය කොදෙව් කණ්ඩායම ලකුණු 10කින් පරාජය කළේය.

හසිනි පෙරේරා සහ හර්ෂිතා සමරවික්‍රම අර්ධ ශතක ලබා ගනිමින් ශ්‍රී ලංකාවට ලකුණු 240ක් ලබා ගැනීමට උපකාරී වූ අතර, ඉනෝකා රණවීර ලකුණු 44කට කඩුලු 4 ක් දවා ගනිමින් ප්‍රතිවාදීන් ලකුණු 230කට සීමා කිරීමට සමත් වූවාය.

මෙම ජයග්‍රහණය වසර 23කට පසු බටහිර ඉන්දීය කොදෙව් හි ශ්‍රී ලංකා කාන්තා කණ්ඩායම ලැබූ පළමු එක්දින තරගමාලා ජයග්‍රහණය සනිටුහන් කරයි.