ලියාපදිංචි දේශපාලන පක්ෂයක් වන ‘අබිනව නිවහල් පෙරමුණ’පක්ෂයේ නව නිලධාරී මණ්ඩලය පිළිගැනීම මැතිවරණ කොමිසම ප්‍රතික්ෂේප කර තිබේ.

පක්ෂ ව්‍යවස්ථාව යටතේ වාර්ෂික මහා සභා රැස්වීම පැවැත්වීමෙන් තොරව නව නිලධාරී මණ්ඩලය තෝරාගෙන ඇති බව කොමිසම පක්ෂයේ ලේකම්වරයාට දන්වා ඇත.

පක්ෂ සභාපතිවරයා හෝ නායකයා විසින් වාර්ෂික මහා සභා රැස්වීම නිසි ලෙස කැඳවනු ලැබුවේද යන්න කොමිසම පැහැදිලි කිරීමක් ඉල්ලා තිබේ.

පක්ෂ ව්‍යවස්ථාවට ගෙන එන ලද සංශෝධන ද කොමිසම පිළිගෙන නොමැත.

පක්ෂ සභාපතිවරයා යැයි කියා ගන්නා අමිත් වීරසිංහට එරෙහිව පක්ෂ ලේකම් ඕෂල හේරත් විසින් කරන ලද පැමිණිල්ලකට අනුව කොමිසමේ තීරණය නිකුත් කර ඇත.

පක්ෂ ව්‍යවස්ථාවට අනුකූලව වාර්ෂික මහා සභා රැස්වීම පැවැත්වීමෙන් පසු පාර්ලිමේන්තු පනතට අනුකූලව ලේඛන ඉදිරිපත් කරන ලෙස කොමිසම පක්ෂ ලේකම්වරයාට දැනුම් දී තිබේ.