ගල්කිස්ස පොලිස් ස්ථානයේ රැඳවුම් නියෝගයක් යටතේ අත්අඩංගුවේ පසුවූ මත්ද්‍රව්‍ය ජාවාරම් සැකකාරියක් පළායෑම සම්බන්ධයෙන් පොලිස් සැරයන්වරුන් දෙදෙනකු සහ කාන්තා පොලිස් කොස්තාපල්වරියකගේ වැඩ තහනම් කර තිබේ.

රාත්‍රී රාජකාරි භාර සැරයන්වරුන් දෙදෙනා මෙන්ම සැකකාරිය ආරක්ෂා කිරීමට පවරා තිබූ කාන්තා පොලිස් කොස්තාපල්වරිය ද මෙම වැඩ තහනමට ඇතුළත් බව පොලිසිය පවසයි.

මොරටුව පොලිස් විශේෂ කාර්ය බලකා කඳවුරේ පිහිටි විශේෂ මෙහෙයුම් ඒකකයට අනුයුක්ත නිලධාරීන් විසින් සැකකාරිය අත්අඩංගුවට ගෙන තිබිණි.

පොලිසියට අනුව, රත්මලානේ මැලිබන් හන්දිය අසල අත්තිඩිය ප්‍රධාන මාර්ගයේ දී හෙරොයින් මිලිග්‍රෑම් 36,650 ක් ළඟ තබාගෙන සිටියදී ඇය අත්අඩංගුවට ගෙන ඇත.

පෙබරවාරි 16 වැනි දින ගල්කිස්ස පොලිස් ස්ථානයේ රැඳවුම් නියෝගයක් යටතේ රඳවා සිටියදී, සැකකාරිය වැසිකිළිය භාවිත කිරීමට අවසර ඉල්ලා සිට තිබේ.

කාන්තා කොස්තාපල්වරියගේ ආරක්ෂාව යටතේ සිටියදී, ඇය අත්අඩංගුවෙන් මිදී මාර්ගයේ නවතා තිබූ යතුරුපැදියකින් පළාගිය බව පොලිසිය පවසයි.

කෙසේවෙතත්, විශේෂ පොලිස් කණ්ඩායමක් පැය අටකට පමණ පසු එදිනම තලවතුගොඩ කිඹුලා-ඇල ප්‍රදේශයේදී සැකකාරිය නැවත අත්අඩංගුවට ගෙන තිබිණි.