පොලිස් දෙපාර්තමේන්තුවේ කීර්ති නාමය ආරක්ෂා කිරීම සහ අනෙකුත් නිලධාරීන්ට ආදර්ශයක් ලබා දීම සඳහා සැකකාර පොලිස් නිලධාරීන් දෙදෙනෙකු රක්ෂිත බන්ධනාගාර ගත කරන ලෙස පොලිසිය කළ ඉල්ලීමක් පවතින නීතිමය විධිවිධානවලට සම්පූර්ණයෙන්ම පටහැනි බවට කොළඹ අතිරේක මහේස්ත්‍රාත් ඕෂධ මිගාර මහආරච්චි සඳහන් කර තිබේ.

ඒ අනුව ජින්තුපිටිය ප්‍රදේශයේ වෙඩි තැබීමේ සිද්ධියක් වැළැක්වීමට අපොහොසත් වීම සම්බන්ධයෙන් සැකපිට අධිකරණයට ඉදිරිපත් කරන ලද පොලිස් සැරයන්වරයකු සහ පොලිස් කොස්තාපල්වරයකු ඇප මත මුදා හැරීමට කොළඹ අතිරේක මහේස්ත්‍රාත්වරයා නියෝග කළේය.

සැකකරුවන් දෙදෙනාම රුපියල් ලක්ෂ 3ක අධි ඇපයක් මත මුදා හැරීමට මහේස්ත්‍රාත්වරයා නියෝග කළේය.

මෝදර අපරාධ කොට්ඨාසය විසින් මෙම නිලධාරීන් දෙදෙනා අත්අඩංගුවට ගෙන අධිකරණයට ඉදිරිපත් කර තිබිණි.

පොලිස් දෙපාර්තමේන්තුවේ කීර්ති නාමය ආරක්ෂා කිරීම සහ අනෙකුත් නිලධාරීන්ට ආදර්ශයක් ලබා දීම සඳහා සැකකරුවන් රක්ෂිත බන්ධනාගාර ගත කරන ලෙස නඩු කටයුතු අතරතුර විමර්ශන නිලධාරීන් ඉල්ලා සිටියද, ඇප පනතේ විධිවිධාන යටතේ එවැනි ඉල්ලීමක් ප්‍රතික්ෂේප කළ යුතු බව අතිරේක මහේස්ත්‍රාත්වරයා සඳහන් කළේය.

ඒ අනුව, ඔවුන්ට ඇප ලබා දෙන ලදී.

වෙඩි තැබීම සිදු වූ අවස්ථාවේ රාජකාරි පැහැර හැරීම සම්බන්ධයෙන් නිලධාරීන් දෙදෙනා අත්අඩංගුවට ගත් බව පොලිසිය අධිකරණයට දැනුම්දුන්නේය.

මෝදර අපරාධ අංශය තවදුරටත් කරුණු දක්වමින් කියා සිටියේ 14 වැනිදා ජින්තුපිටියේදී වෙඩි තැබීමක් සිදුවී ඇති බවත්, එහි ප්‍රතිඵලයක් ලෙස එක් අයකු මිය ගිය බවත්ය.

සිද්ධිය වන අවස්ථාවේ සැකකාර නිලධාරීන් දෙදෙනා ආයුධ සන්නද්ධව සිටි බවත් ජංගම මුර සංචාරයේ යෙදී සිටි බවත් පොලිසිය තවදුරටත් අධිකරණයට දැනුම්දුන්නේය.

වෙඩි තැබීම සිදු වූ ස්ථානය අසල ගිනි අවි සමඟ නිලධාරීන් දෙදෙනා රාජකාරියේ යෙදී සිටියද, සිද්ධියට සම්බන්ධ අපරාධකරුවන් අත්අඩංගුවට ගැනීමට ඔවුන් පියවර ගෙන නොමැති බවට කරුණු මතු වී ඇති බව පොලිසිය ප්‍රකාශ කළේය.

දණ්ඩ නීති සංග්‍රහයේ 289/102 වගන්ති සහ පොලිස් ආඥා පනතේ 56(අ) සහ (ආ) වගන්ති යටතේ සැකකරුවන් වගකිව යුතු බව ද පොලිසිය අධිකරණයට දැනුම්දුන්නේය.

දණ්ඩ නීති සංග්‍රහයේ 296/317 වගන්ති යටතේ වැරදි සිදු වී ඇතිද යන්න සහ සැකකරුවන් 292 වගන්තිය යටතේ අපරාධයට ආධාර අනුබල දී තිබේද යන්න තීරණය කිරීම සඳහා ද පරීක්ෂණ පවත්වන බව අධිකරණයට දන්වන ලදී.

මෙම අවස්ථාවේදී, ඇප ප්‍රතික්ෂේප කිරීමට ප්‍රමාණවත් සාක්ෂි තිබේදැයි මහේස්ත්‍රාත්වරයා විමසීය.

සැකකරුවන්ගේ දුරකථන වාර්තා අවශ්‍ය බව විමර්ශන නිලධාරීන් ප්‍රතිචාර දැක්වූ අතර, පොලිස් දෙපාර්තමේන්තුවේ කීර්ති නාමය ආරක්ෂා කරගැනීමට සහ අනෙකුත් නිලධාරීන්ට ආදර්ශයක් ලබාදීම සඳහා සැකකරුවන් රිමාන්ඩ් භාරයට පත්කරන ලෙස පොලිසිය ඉල්ලා සිටියේය.

සැකකරුවන් වෙනුවෙන් පෙනී සිටි නීතිඥ ආර්.ඒ.පී. රණවක, ප්‍රසාද් සිල්වා සහ සම්පත් ජයවර්ධන යන පිරිස සඳහන් කළේ, අධිකරණයට ඉදිරිපත් කරන ඕනෑම චෝදනාවක් නිශ්චිත විය යුතු බවත්, පොලිසිය විසින් ගොනු කරන ලද චෝදනා පත්‍රයේ එවැනි විශේෂත්වයක් නොමැති බවත්ය.

සැකකාර නිලධාරීන් දෙදෙනා වෙඩි තැබීමට ආධාර කළ හෝ අනුබල දුන් බවට බී-වාර්තාවේ කිසිදු චෝදනාවක් අඩංගු නොවන බවත්, ඔවුන් රිමාන්ඩ් භාරයට පත්කරන ලෙස කළ ඉල්ලීම දුර්වල බවත් ඔවුහු තවදුරටත් පෙන්වා දුන්හ.

කුමන්ත්‍රණයක් හෝ ආධාර සහ අනුබල දීමක් නොමැති විට එවැනි චෝදනා ඉදිරිපත් කිරීම කණගාටුදායක බව ද නීතිඥවරයා ඉදිරිපත් කළේය. ප්‍රදේශයේ ශාලාවක පැවති උත්සවයක් අතරතුර වෙඩි තැබීම සිදුවී ඇති බව ඔවුහු තවදුරටත් අධිකරණයට දැනුම් දුන්හ.

ඒ මොහොතේ නිලධාරීන් දෙදෙනා සැකකරුවන් වෙත ගිනි අවි භාවිත කළේ නම්, එම ස්ථානයේ සිටි සිවිල් වැසියන්ට බරපතළ හානියක් සිදු වීමේ අවදානමක් ඇති බව විත්තිකරු තර්ක කළහ.

උත්සවය අතරතුර රතිඤ්ඤා පත්තු කර ඇති බවත්, එමඟින් නිලධාරීන්ට වෙඩි හඬ සහ රතිඤ්ඤා හඬ අතර වෙනස හඳුනා ගැනීමට අපහසු වී ඇති බවටත් කරනු ඉදිරිපත් විය.

කෙසේවෙතත්, සිද්ධියෙන් ටික වේලාවකට පසු නිලධාරීන් දෙදෙනා එම ස්ථානයට ගිය බවත්, ඒ වන විට තුවක්කුකරුවන් පලා ගොස් සිටි බවත් නීතිඥවරයා පැවසීය.

කොළඹ මහේස්ත්‍රාත් අධිකරණ පරිශ්‍රය තුළ මීට පෙර වෙඩි තැබීමේ සිද්ධියක් සිදුවී ඇති අතර එහි ප්‍රතිඵලයක් ලෙස මරණයක් සිදුවී ඇතත්, ඒ අවස්ථාවේ එහි සිටි කිසිදු නිලධාරියකු අත්අඩංගුවට ගෙන නොමැති බව නීතිඥවරයා තවදුරටත් සඳහන් කළේය.

ජංගම දුරකථන වාර්තා ලබාගැනීම සඳහා තම සේවාදායකයන් රිමාන්ඩ් කිරීම අනවශ්‍ය බව ද විත්ති පාර්ශවය සඳහන් කළේය.

සැකකරුවන්ට ඇප ප්‍රතික්ෂේප කිරීම සඳහා ප්‍රමාණවත් තරම් ශක්තිමත් හේතු ඉදිරිපත් කිරීමට පැමිණිල්ල අපොහොසත් වී ඇති බව මහේස්ත්‍රාත්වරයා නිරීක්ෂණය කළේය.

බී -වාර්තාවෙන් ඉල්ලා සිටියේ පොලිස් දෙපාර්තමේන්තුවේ කීර්ති නාමය ආරක්ෂා කිරීම සහ අනෙකුත් නිලධාරීන්ට ආදර්ශයක් සැපයීම සඳහා සැකකරුවන් රිමාන්ඩ් කිරීමට පමණි.

එවැනි ඉල්ලීමක් පවතින නීතිමය විධිවිධානවලට සම්පූර්ණයෙන්ම නොගැළපෙන බව අධිකරණය තීරණය කළේය.

ඒ අනුව, සැකකරුවන් ඇප මත මුදා හැරීමට නියෝග කළ මහේස්ත්‍රාත්වරයා, සැකකරුවන්ගේ දුරකථන දත්ත වාර්තා කැඳවීමට වැඩිදුරටත් නියෝග කළේය.

නඩුව අප්‍රේල් 27 වැනිදා නැවත කැඳවීමට ද නියමිතය.