February 12, 2026
පිළියන්දල කරදියාන අංගණයට කසළ බැහැර කිරීමට නිසි අවසරය ඇති පළාත් පාලන ආයතන 07 හැරුණු කොට කාලයක් තිස්සේ හොර පාරෙන් මෙහි වෙනත් පිරිසක් කසළ බැහැර කරමින් සිදු කළ මහාපරිමාණ වංචාවක් නීතියේ රැහැනට හසුකර ගැනීමට කැස්බෑව නගර සභාවේත් අපද්රව්ය කළමනාකරණ අධිකාරියේත් සභාපතිවරුන් පෙරේදා (10) සමත්ව තිබේ.
ඊට සම්බන්ධ පෞද්ගලික ආයතනයක ටිපර් රථ රියැදුරකු පොලිස් අත්අඩංගුවට ගැනීමට කටයුතු කළ බව කැස්බෑව නගර සභාවේ සභාපති චාමර මද්දුම කළුගේ පැවසීය.
එම කසළ අංගණයේ වැඩ පරීක්ෂකවරයාගේ සහ ආර්ථික සංවර්ධන අධිකාරියට අයත් ආරක්ෂක නිලධාරීන් දෙදෙනාගේ ද සේවය අත්හිටුවූ බව අපද්රව්ය කළමනාකරණ අධිකාරියේ සභාපති චතුර කහඳවආරච්චි පැවසීය. කැස්බෑව නගර සභා බල ප්රදේශයට අයත් කරදියාන කසළ අංගණයට පළාත් පාලනය ආයතන හතක කසළ බැහැර කිරීම සිදුකෙරේ. මෙම භූමිය කැස්බෑව නගර සභාවට අයත් බව කැස්බෑව නගර සභාවේ සභාපතිවරයා සඳහන් කළේය. ඊට පරිබාහිරව පිටස්තර පුද්ගලයන් කරදියාන ඝන අපද්රව්ය කළමනාකරණ මධ්යස්ථානයේ අභ්යන්තර සේවකයන් ද සම්බන්ධ කරගෙන කාලයක් තිස්සේ මෙම ස්ථානයට කසළ බැහැර කිරීම හේතුවෙන් නගර සභාවට මෙන්ම ප්රතිචක්රීකරණය මධ්යස්ථානයට හිමි විය යුතු මුදල් මෙන්ම කසළ බැහැර කිරීමේ ක්රමවත්භාවය අහිමි වී ඇතැයි ද සභාපතිවරයා කීය.
මේ සම්බන්ධයෙන් සභාපතිවරයා වැඩිදුරටත් මෙසේ ද කීය.
“බෝකුන්දර ආර්ථික මධ්යස්ථානයේ කසළ බැහැර කිරීම සඳහා වසර 5/6 ආසන්න කාලයක සිට පෞද්ගලික ආයතනයකටයි බාරදීලා තියෙන්නේ. නමුත් කසළ බැහැර කිරීමේ වගකීම තියෙන්නේ පළාත් පාලන ආයතනයටයි. ඒකෙන් ඔබ්බට ගිහිල්ලයි, ආර්ථික මධ්යස්ථානයේ කළමනාකරණ සංයුතිය විසින් ඒ තීරණය අරන් තියෙන්නේ පෞද්ගලික ආයතනයට කසළ බැහැර කරන්න දෙන්න ඕනෑ කියලා.
ඒ පෞද්ගලික ආයතනය ටෙන්ඩරය අරගෙන නිසි ක්රමවේදයෙන් තොරව ආරක්ෂක නිලධාරි හා සේවකයොත් සම්බන්ධ කරගෙන අපේ මේ භූමි භාගයට කසළ බැහැර කිරීමේ ජාවාරම කාලයක සිට කරලා තියෙන්නේ. නගර සභාවට කිසිදු ගෙවීමක් කරල නෑ. මේ නාස්ති කරන්නේ, විනාශ කරන්නේ අපේ මේ භූමිභාගය පමණක් නොවේ රජයට හිමි විය යුතු මුදල් අහිමි කිරීමක්. සභාපතිතුමාගෙන් මෙන්ම බස්නාහිර පළාත් සභාවේ ප්රධාන ලේකම්තුමාගෙන් අපි විශේෂයෙන් ඉල්ලා සිටිනවා මේ ජාවාරමට සම්බන්ධ සියලු දෙනාටත් තනතුරු භේදයෙන් තොරව නීතිය ක්රියාත්මක කරන්න කියලා.”
මෙහිදී අත්අඩංගුවට ගත් කසළ ලොරි රථයේ රියැදුරු පොලිස් ඇප මත මුදාහැර ඇත. සැකකරු අධිකරණය වෙත ඉදිරිපත් කිරීමට නියමිත බව පොලීසිය කියයි.(දිනමිණ)
