උතුරු මැද පළාත් මහාධිකරණය ඊයේ (11) උතුරුමැද පළාත් ආණ්ඩුකාරවරයා ඇතුළු නිලධාරීන් හයදෙනෙකුට ලබන 27 වැනි දින අධිකරණයේ පෙනීසිටින ලෙස නොතීසි නිකුත් කළේය.

පළමු ශ්‍රේණියේ විදුහල්පතිවරුන් පිරිසක් නීතිවිරෝධී ලෙස පත්කර ඇති බවට චෝදනා කරමින් අනුරාධපුර මහාධිකරණය හමුවේ ගොනුකර ඇති රිට් පෙත්සම් හයක් සලකා බලන අතරතුර මෙය සිදුවිය.

මෙම පෙත්සම් මහාධිකරණ විනිසුරු අනුෂ්ක සෙනෙවිරත්න ඉදිරියේ කැඳවන ලදී.

නොතීසි නිකුත් කරන ලද අනෙකුත් නිලධාරීන් අතර ආණ්ඩුකාර ලේකම්, පළාත් සභා ප්‍රධාන ලේකම්, පළාත් ප්‍රධාන ලේකම් සහ උතුරු මැද පළාත් රාජ්‍ය සේවා කොමිෂන් සභාවේ ලේකම් ද වේ.

නීත්‍යානුකූලව ස්ථාපිත බඳවාගැනීමේ ක්‍රියාවලීන් මඟහරිමින්, අක්‍රමවත් සහ නීතිවිරෝධී ක්‍රියාපටිපාටි හරහා උතුරු මැද පළාතේ පළමු ශ්‍රේණියේ විදුහල්පතිවරුන් ලෙස පුද්ගලයන් ගණනාවක් පත්කර ඇති බව පෙත්සම්කරුවෝ පවසති.