කථානායක ජගත් වික්‍රමරත්නට එරෙහිව ගොනු කර ඇති පැමිණිල්ලක් සම්බන්ධයෙන් විමර්ශනවලට බාධා වන ආකාරයෙන් කථානායකවරයාගේ පෞද්ගලික ලේකම්වරයා කටයුතු කරන බවට චෝදනා කරමින් සමගි ජන බලවේගයේ මන්ත්‍රීවරුන් පිරිසක් අල්ලස් හෝ දූෂණ චෝදනා විමර්ශන කොමිසමට අද (11) පැමිණිල්ලක් ඉදිරිපත් කළහ.

පෙර පැමිණිල්ලේ සඳහන් කරුණු සම්බන්ධයෙන් කථානායකවරයාට වාර්තාවක් ඉදිරිපත් කරන ලෙස කථානායකවරයාගේ පෞද්ගලික ලේකම්වරයා පාර්ලිමේන්තු මහලේකම්වරයාට දැනුම් දී ඇති බව සමගි ජන බලවේගයේ මන්ත්‍රීවරු තම පැමිණිල්ල හරහා පෙන්වා දුන්හ.

පෙබරවාරි 2 වැනිදා වැඩ තහනමට ලක් කරන ලද පාර්ලිමේන්තුවේ නියෝජ්‍ය මහලේකම් සහ කාර්ය මණ්ඩල ප්‍රධානී චමින්ද කුලරත්න කථානායක ජගත් වික්‍රමරත්නට එරෙහිව දූෂණ චෝදනා එල්ල කරමින් අල්ලස් කොමිසමට පැමිණිල්ලක් ගොනු කළේය.

කුලරත්න තම පැමිණිල්ලේ දී චෝදනා කළේ කථානායකවරයාට ඔහුගේ හිමිකම් සීමාව ඉක්මවා නිල වාහන භාවිත කිරීම, නීති විරෝධී ලෙස ඉන්ධන දීමනා දෙකක් ලබා ගැනීම සහ නිල නිවාස දෙකක් භාවිත කිරීම ඇතුළු උල්ලංඝනයන් කිහිපයක් සම්බන්ධයෙනි.

සමගි ජන බලවේගයේ පාර්ලිමේන්තු මන්ත්‍රී හර්ෂණ රාජකරුණා පාර්ලිමේන්තුවේදී පෙබරවාරි 5 වැනිදා හෙළි කළේ, කථානායකවරයාගේ පෞද්ගලික ලේකම්වරයා පැමිණිල්ලට අදාළ තොරතුරු ඉල්ලා පාර්ලිමේන්තු මහලේකම්වරයා වෙත ලිපියක් යවා ඇති බවයි.

ඒ අනුව, කථානායකවරයාගේ පෞද්ගලික ලේකම්වරයා විසින් යවන ලද ලිපිය සම්බන්ධයෙන් පැමිණිල්ලක් ගොනු කිරීම සඳහා පාර්ලිමේන්තු මන්ත්‍රී රාජකරුණාගේ නායකත්වයෙන් යුත් සමගි ජන බලවේගයේ මන්ත්‍රීවරුන් පිරිසක් අද උදෑසන අල්ලස් කොමිසමට පැමිණියහ.