අසල්වැසි ඉන්දියාවේ සහ බංග්ලාදේශයේ නිපා වෛරසය පැතිරීම හා මරණ වාර්තා වීමෙන් පසුව, සෞඛ්‍ය බලධාරීන් පිවිසුම් ස්ථානවල දැඩි සුපරීක්ෂාකාරීත්වයක් පවත්වා ගෙන යන බවට ශ්‍රී ලංකා රජය ඊයේ මහජනතාවට සහතික විය.

මාධ්‍ය හමුවක් අමතමින් කැබිනට් ප්‍රකාශක අමාත්‍ය නලින්ද ජයතිස්ස පැවසුවේ ඉන්දියාවේ වෛරසය මතු වී බංග්ලාදේශයේ මරණ වාර්තා වූ වහාම සෞඛ්‍ය අමාත්‍යාංශය මේ සම්බන්ධයෙන් අවධානය යොමු කළ බවයි.

ගුවන්තොටුපළේ නිශ්චිත නිරෝධායන හෝ හඳුනාගැනීමේ යාන්ත්‍රණ ක්‍රියාත්මක වේද යන්න පිළිබඳ මතුකළ ප්‍රශ්නවලට ප්‍රතිචාර දක්වමින් අමාත්‍යවරයා පැවසුවේ විශේෂයෙන් විදේශීය සංචාරකයන් විශාල සංඛ්‍යාවක් ආකර්ෂණය වන ICC T20 ලෝක කුසලානය සැළකිල්ලට ගෙන, බලධාරීන් දැනටමත් රටට පැමිණෙන සියලුම මගීන් නිරීක්ෂණය කරමින් සිටින බවයි.

“බංග්ලාදේශයේ මෑත මරණය වාර්තා වීමට පෙර පවා, පැමිණෙන සියලුම සංචාරකයන් සම්බන්ධයෙන් අපි ගුවන්තොටුපළේ අවශ්‍ය අධීක්ෂණ කටයුතු ආරම්භ කර තිබුණා,” අමාත්‍ය ජයතිස්ස පැවසීය.

නිපා වෛරසය හා සම්බන්ධ ඉහළ මරණ අනුපාතය ඔහු පිළිගත් අතර, එය කොවිඩ් 19 වසංගතයට සාපේක්ෂව වෙනස් අභියෝගයක් බව සඳහන් කළේය.

කෙසේවෙතත්, සෞඛ්‍ය අංශය පූර්ණ දැනුවත්භාවයකින් යුතුව ක්‍රියාත්මක වන බවත් අවශ්‍ය සියලු පූර්වාරක්ෂාවන් ගැනීමට සූදානම් බවත් ඔහු සහතික විය.

සංචාරක ව්‍යාපාරයේ වත්මන් ඉහළ යෑම සැළකිල්ලට ගෙන මෙම පියවරවල වැදගත්කම අමාත්‍යවරයා අවධාරණය කළේය.

මෙම මාසයේ මුල් දින හතර තුළ පමණක් සංචාරකයන් 40,000කට අධික සංඛ්‍යාවක් දිවයිනට පැමිණ ඇති බව ඔහු අනාවරණ කළේය.

තවද, 2026 ජනවාරි මාසයේදී එම මාසය සඳහා ඉතිහාසයේ වැඩිම සංචාරකයන් සංඛ්‍යාවක් වාර්තා වූ අතර එය 277,000කි.

“සංචාරකයන්ගේ පැමිණීම වැඩිවීමත් සමඟ අපි අතිශයින්ම විමසිල්ලෙන් සිටිනවා. අවශ්‍ය පියවර ගැනීමට සෞඛ්‍ය අමාත්‍යාංශය සම්පූර්ණයෙන්ම සූදානම්,” අමාත්‍යවරයා තවදුරටත් පැවසීය.