කැෆේන් බවට පත් කළ කෝපි ඩිමෙන්ශියා අවදානම අඩු කළ හැකි බවට නව පර්යේෂණවලින් පෙනී ගොස් තිබේ.

නිරෝගී වැඩිහිටියන් 132,000කට ආසන්න සංඛ්‍යාවක් යොදා ගනිමින් කළ දීර්ඝ කාලීන නිරීක්ෂණ අධ්‍යයනයක දී පෙනීගොස් ඇත්තේ, කැෆේන් කළ කෝපි කෝප්ප දෙකේ සිට තුන දක්වා හෝ තේ කෝප්ප එකක් හෝ දෙකක් දිනපතා පරිභෝජනය කිරීම ඩිමෙන්ශියා අවදානම අඩු කිරීම, සංජානන පරිහානිය මන්දගාමී කිරීම සහ සංජානන ක්‍රියාකාරිත්වය ආරක්ෂා කිරීම සමඟ සම්බන්ධ වී ඇති බවයි.

අදාළ අධ්‍යයනයේ සොයාගැනීම් ඇමරිකානු වෛද්‍ය සංගමයේ ජර්නලයේ සඳුදා ප්‍රකාශයට පත් කරන ලදී.

“කෝපි නොබොන අයට කෝපි පානය ආරම්භ කරන්න කියලා අපි නිර්දේශ කරන්නේ නැහැ,” බොස්ටන්හි මාස් ජෙනරල් බ්‍රිග්හැම් හි පර්යේෂණ අභ්‍යාසලාභියකු සහ ප්‍රධාන අධ්‍යයන කතුවරයා වන ආචාර්ය යූ ෂැං පැවසීය.

“දැනටමත් කෝපි පානය කරන පුද්ගලයන් සඳහා, ප්‍රතිඵල සැබවින්ම සහතික කළ හැකි බව අපි දුටුවා.” යැයි ඔහු පැවසීය.

කැෆේන් නොකළ කෝපි මගින් මෙම ස්නායු ආරක්ෂණ ප්‍රතිලාභ ලබාදී නැත.

මාස් ජෙනරල් බ්‍රිග්හැම්ට අමතරව, හාවඩ් ටී.එච්. චෑන්හි මහජන සෞඛ්‍ය පාසල සහ හාවර්ඩ් හි බ්‍රෝඩ් ආයතනය එක්ව 1980 සිට 2023 දක්වා සාමූහිකව විහිදී ගිය පර්යේෂණ දත්ත කට්ටල දෙකකින් සෞඛ්‍ය වෘත්තිකයන්ගේ සෞඛ්‍ය සහ කැෆේන් පුරුදු අධ්‍යයනය කර තිබේ.

පළමුවැන්න වූ හෙද සෞඛ්‍ය අධ්‍යයනයට සාමාන්‍ය වයස අවුරුදු 46ක් වූ කාන්තාවන් 86,000කට වැඩි පිරිසක් සම්බන්ධ කර ගෙන තිබිණි.

දෙවැන්නේදී පිරිමින්ගේ සෞඛ්‍යය කෙරෙහි අවධානය යොමු කළ අනුපූරක ව්‍යාපෘතියක් වන සෞඛ්‍ය වෘත්තිකයන්ගේ පසු විපරම් අධ්‍යයනයට සාමාන්‍ය වයස අවුරුදු 54ක් වූ පිරිමින් 45,000කට වැඩි පිරිසක් සම්බන්ධ කර ගත්හ.

නිතිපතා කෝපි, කැෆේන් රහිත කෝපි සහ තේ පරිභෝජනය මැනීම සඳහා, සහභාගිවන්නන් සියලුදෙනා සෑම වසර දෙකකටත් හතරකටත් වරක් ආහාර ප්‍රශ්නාවලියක් සම්පූර්ණ කළහ.

අවුරුදු 37කට ආසන්න මධ්‍යන්‍ය පසු විපරම් කාලයකින් පසු, පුද්ගලයන් 11,000කට වැඩි පිරිසකට ඩිමෙන්ශියාව ඇති බව හඳුනාගෙන තිබිණි.

වැඩිපුර කැෆේන් සහිත කෝපි හෝ තේ පරිභෝජනය කළ පුද්ගලයන්ට ඩිමෙන්ශියාව වර්ධනය වීමේ සම්භාවිතාව අඩු වූ අතර, වයස අවුරුදු 75 සහ ඊට අඩු අය අතර ශක්තිමත් සම්බන්ධතාවක් තිබිණි.

විශේෂයෙන්, වැඩිපුරම කැෆේන් සහිත කෝපි පානය කළ පුද්ගලයන්ට අවම වශයෙන් පානය නොකළ අයට වඩා 18%ක අඩු අවදානමක් තිබිණි.

තේ පානය කරන්නන් අතර, වැඩිපුරම පරිභෝජනය කළ පුද්ගලයන්ට අවම වශයෙන් පරිභෝජනය නොකළ අයට වඩා 14%ක අඩු අවදානමක් තිබිණි.

කෝපි හෝ තේ පානය නොකළ පුද්ගලයන් හා සසඳන විට, දිනකට කැෆේන් සහිත කෝපි කෝප්ප දෙකේ සිට තුන දක්වා හෝ තේ කෝප්ප එකක් හෝ දෙකක් පානය කළ අයට අවම ඩිමෙන්ශියා අවදානමක් තිබිණි.

එය දිනකට කැෆේන් මිලිග්‍රෑම් 300ක් පමණ වේ.

එපමණක් නොව, ඇල්සයිමර් රෝගය සඳහා සැළකිව යුතු ජානමය අවදානම් සාධකයක් වන APOE4 ජානය ඇති අය ඇතුළුව, ඩිමෙන්ශියා වර්ධනය වීමේ ඉහළ අවදානමක් ඇති පුද්ගලයන් සඳහා කැෆේන් සහිත කෝපි සහ තේ පරිභෝජනය සහ ඩිමෙන්ශියා අවදානම අතර සම්බන්ධය පැහැදිලි වී තිබේ.

එසේ වුවද, ෂැං පැවසුවේ ඩිමෙන්ශියාව යනු ආහාරමය මැදිහත්වීමකින් සම්පූර්ණයෙන්ම වළක්වා ගත නොහැකි සංකීර්ණ තත්ත්වයක් බවයි.

“කෝපි පානය කිරීමෙන් පමණක් මිනිසුන්ට ඩිමෙන්ශියාව වැළඳීම වැළැක්විය හැකි ඉන්ද්‍රජාලික බලපෑමක් ලබා දිය නොහැකියි,” ඔහු පැවසීය.

2021 දී ගෝලීය වශයෙන්, මිලියන 57ක ජනතාවක් ඩිමෙන්ශියාවෙන් පෙළුණු බව ලෝක සෞඛ්‍ය සංවිධානය පවසයි.

මෙම තත්ත්වය කාන්තාවන්ට අසමාන ලෙස බලපාන අතර ඇල්සයිමර් රෝගය එහි වඩාත් පොදු ආකාරය වී තිබිණි.