කුලී නිවැසියන් ආරක්ෂා කිරීමේ යෝජිත පනත් කෙටුම්පත අභියෝගයට ලක් කරමින් ඉදිරිපත් කළ පෙත්සම් ශ්‍රේෂ්ඨාධිකරණය හමුවේ අද කැඳවනු ලැබූ අතර, නීති කෙටුම්පත නැවත පරීක්ෂා කිරීම සඳහා නව කමිටුවක් පත් කරන බව නීතිපති දෙපාර්තමේන්තුව අධිකරණයට දැනුම් දුන්නේය.

මහින්ද සමයවර්ධන, අර්ජුන ඔබේසේකර සහ සම්පත් අබේකෝන් යන විනිසුරුවරුන්ගෙන් සමන්විත ත්‍රිපුද්ගල විනිසුරු මඩුල්ලක් ඉදිරියේ මෙම කරුණු විභාග කෙරිණි.

අධිකරණ අමාත්‍යාංශයේ ලේකම්වරයා විසින් පෙබරවාරි 6 වැනිදා නිකුත් කරන ලද ලිපියකට අනුව, කුලී නිවැසියන් ආරක්ෂා කිරීමේ පනත් කෙටුම්පත සහ අදාළ කුලී (අවලංගු කිරීමේ) පනත් කෙටුම්පත නැවත සළකා බැලීම සඳහා නව කමිටුවක් පත් කරන බව නීතිපතිවරයා වෙනුවෙන් පෙනී සිටි ජ්‍යෙෂ්ඨ අතිරේක සොලිසිටර් ජනරාල් සුමති ධර්මවර්ධන අධිකරණයට දැනුම් දුන්නේය.

යෝජිත කමිටුවට නීතිපති දෙපාර්තමේන්තුවේ, ශ්‍රී ලංකා නීතිඥ සංගමයේ සහ අධිකරණ අමාත්‍යවරයා විසින් පත් කරන ලද කීර්තිමත් සාමාජිකයන්ගේ නියෝජිතයන් ඇතුළත් වන බව ඔහු අධිකරණයට පැවසීය.

නීති කෙටුම්පතට අවශ්‍ය සංශෝධන යෝජනා කිරීමට පෙර මහජන නියෝජනයන් සහ පෙත්සම්වල මතු කර ඇති ගැටළු කමිටුව විසින් සළකා බලනු ඇතැයි අපේක්ෂා කෙරේ.

පෙත්සම්කරුවන් වෙනුවෙන් ජනාධිපති නීතිඥ ෆයිසර් මුස්තාපා පෙනී සිටියේය.

නව කමිටුව විසින් කෙටුම්පත නැවත සළකා බලන බවට නීතිපති දෙපාර්තමේන්තුව විසින් ලබා දුන් පොරොන්දුව මත පදනම්ව, පෙත්සම්කරුවන් නඩු ඉල්ලා අස්කර ගත්හ.