2028 දී පමණ නැවත ණය පැහැර හැරීමක් සිදුවනු ඇතැයි යන පදනම් විරහිත බිය ඔහු ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ ප්‍රතික්ෂේප කළේය.

ශ්‍රී ලංකාව තවත් ස්වෛරී ණය අර්බුදයකට මුහුණ නොදෙන අබවත් නියමිත පරිදි ප්‍රතිව්‍යුහගත කරන ලද බාහිර ණය ආපසු ගෙවීම ආරම්භ කරන බවත් ඔහු පැවසීය.

ලංකා වාණිජ මණ්ඩලය විසින් සංවිධාන කරන ලද උත්සවයකදී අදහස් දක්වමින්, රජයට සහ මහ බැංකුවට ඉදිරි ණය සේවා බැඳීම් සපුරාලීමට නොහැකි වනු ඇති බවට කරන ප්‍රකාශ ප්‍රතික්ෂේප කළ අධිපතිවරයා, එවැනි අදහස් ශ්‍රී ලංකාවේ පශ්චාත් අර්බුද ප්‍රකෘතිමත් වීමේ සංවේදී අවස්ථාවක ආයෝජක විශ්වාසය අඩපණ කිරීමේ අවදානමක් ඇති කරන බවට අනතුරු ඇඟවීය.

“කිසිදු ප්‍රතිව්‍යුහගත කිරීමක් හෝ වෙනත් පැහැර හැරීමක් ගැන කතා කරන්න පවා මට කිසිදු හේතුවක් පෙනෙන්නේ නැහැ. එය සම්පූර්ණයෙන්ම වැරදි ලෙස මෙහෙයවන ලද වැරදි වැටහීමක්. එය ශ්‍රී ලංකාවට ණය දීමට කැමති ආයෝජකයන් සහ රටවල් අතර අනවශ්‍ය සැකයක් ඇති කරනවා,” ඔහු පැවසීය.

විදේශ සංචිත දැඩි ලෙස ක්ෂය වී බාහිර ණය ගෙවීම් අත්හිටුවීමට බල කළ 2022 වන තෙක් ශ්‍රී ලංකාව සිය ස්වෛරී ණය බැඳීම් සපුරාලීමේ ශක්තිමත් වාර්තාවක් පවත්වා ගෙන ගිය බව මහ බැංකුවේ අධිපතිවරයා සඳහන් කළේය.

එතැන් සිට එම ස්ථාවරය සැළකිව යුතු ලෙස වෙනස් වී ඇති බව ඔහු පැවසීය.

2025 දී බාහිර ණය සේවා බැඳීම් ඩොලර් බිලියන 2.5ක් පමණ විය.

ඉදිරිය දෙස බලන විට, වාර්ෂික ණය සේවාකරණය සාමාන්‍යයෙන් ඩොලර් බිලියන 3.5ක් පමණ වනු ඇතැයි අපේක්ෂා කෙරේ.

ඉදිරි වසර දෙක තුළ ඩොලර් බිලියන 8ත් 10ත් අතර දළ නිල සංචිත ගොඩනැගීමට මහ බැංකුව අපේක්ෂා කරන අතර එමඟින් තවදුරටත් ප්‍රතිව්‍යුහගත කිරීමේ අවශ්‍යතාව ඉවත් වේ.

ආසියානු සුරැකුම්පත් පර්යේෂණ ප්‍රධානී සංජීව ප්‍රනාන්දු මෑතකදී ආයෝජක සංසදයකට පැවසුවේ 2026 සහ 2027 සඳහා බාහිර ණය පියවීමේ බැඳීම් වසරකට ඩොලර් බිලියන 2.5 නොඉක්මවන බවයි.

කොළඹ පදනම් කරගත් චින්තන පර්ෂදයක් වන අරුත පර්යේෂණ අධ්‍යක්ෂ උමේෂ් මොරමුදලි පසුගිය සැප්තැම්බර් මාසයේදී තර්ක කළේ 2028න් පසු ණය ආපසු ගෙවීම් පිළිබඳ බිය අතිශයෝක්තියට නංවා ඇති බවයි.

2028 දී, ශ්‍රී ලංකාව ජපානය, චීනයේ EXIM බැංකුව සහ ඉන්දියාවේ EXIM බැංකුව වෙත ද්විපාර්ශ්වික ණය සඳහා ප්‍රාග්ධන ආපසු ගෙවීම් ආරම්භ කරන අතර, සාර්ව-සම්බන්ධිත බැඳුම්කර සඳහා ගෙවීම් සහ කල්පිරීම් ද එම වසරේ ආරම්භ කිරීමට නියමිතය.

කෙසේවෙතත්, 2026 සහ 2027 දී පොලී ගෙවීම් සහ බහුපාර්ශ්වික (ආසියානු සංවර්ධන බැංකුව, ලෝක බැංකුව) ණය ආපසු ගෙවීම් ඇතුළත් ඩොලර් බිලියන 2ක ණය සේවා අවශ්‍යතා හා සසඳන විට එය අතිරේක ඩොලර් බිලියන 1ක් බව මොරමුදලි පැවසීය.

නව රාජ්‍ය ණය කළමනාකරණ කාර්යාලය විදේශ සම්පත් දෙපාර්තමේන්තුවෙන් භාරගත් පසු සංකීර්ණ ණය ගැනීම් කළමනාකරණය කිරීමේ හැකියාව තිබේද යන්න පිළිබඳ ප්‍රශ්න පවතින නමුත්, අන්තර්ජාතික මූල්‍ය අරමුදලේ මූලික ප්‍රක්ෂේපණවලට වඩා වේගයෙන් තම ණය බර අඩු කර ගැනීමට රට ගමන් කරමින් සිටින බව ඔහු පැවසීය.