ලිබියානු හිටපු නායක මුවම්මර් ගඩාෆිගේ වඩාත් ප්‍රකට පුත්‍රයා වන සයිෆ් අල්-ඉස්ලාම් ගඩාෆි ලිබියාවේදී ඝාතනය කර ඇති බව වාර්තා වේ.

සයිෆ් අල්-ඉස්ලාම් ගඩාෆිගේ නීතිඥ කලීඩ් අල්-සයිඩි සහ ඔහුගේ දේශපාලන උපදේශක අබ්දුල්ලා ඔත්මන් ෆේස්බුක් හි වෙනම සටහන් මගින් 53 හැවිරිදි ගඩාෆිගේ මරණය ඊයේ (3) නිවේදනය කර තිබිණි.

ලිබියානු අගනුවර වන ට්‍රිපොලි සිට කිලෝමීටර් 136ක් නිරිත දෙසින් පිහිටි සින්තාන් නගරයේ පිහිටි නිවසේදී සන්නද්ධ පුද්ගලයන් ගඩාෆි ඝාතනය කළ බව ඔත්මන් පැවසූ බව ලිබියානු ප්‍රවෘත්ති ආයතනයක් වන ෆවාසෙල් මීඩියා උපුටා දක්වයි.

පසුව ගඩාෆිගේ දේශපාලන කණ්ඩායම ප්‍රකාශයක් නිකුත් කරමින් කියා සිටියේ, ‘වෙස්මුහුණු පැළඳගත් මිනිසුන් හතර දෙනෙක්’ ඔහුගේ නිවසට කඩා වැදී ‘බියගුලු හා ද්‍රෝහී ඝාතනය’ සිදුකළ බවයි.

ඔවුන්ගේ දරුණු අපරාධවල සලකුණු සැඟවීමට ගත් උත්සාහයක් ලෙස නිවසේ ආරක්ෂක කැමරා වසා දැමූ ප්‍රහාරකයන් සමඟ ඔහු ගැටුණු බව ද දේශපාලන කණ්ඩායම ප්‍රකාශ කර තිබේ.

අන්තර්ජාතිකව පිළිගත් රජයේ ආයතනයක් වන ට්‍රිපොලි හි පිහිටි ඉහළ රාජ්‍ය කවුන්සිලයේ හිටපු ප්‍රධානියා වන කලීඩ් අල්-මිෂ්රි, සමාජ මාධ්‍ය සටහනකින් ඉල්ලා සිටියේ ඝාතනය සම්බන්ධයෙන් ‘හදිසි සහ විනිවිද පෙනෙන පරීක්ෂණයක්’ පවත්වන ලෙසයි.

ගඩාෆිට කිසි විටෙකත් ලිබියාවේ නිල තනතුරක් නොතිබිණි.

කෙසේවෙතත් 2000 සිට 2011 දක්වා ඔහු පියාගේ අංක දෙක ලෙස සළකනු ලැබීය.

මුවම්මර් ගඩාෆි ලිබියානු විපක්ෂ හමුදා විසින් ඝාතනය කර දශක ගණනාවක් පැවති ඔහුගේ පාලනය අවසන් කරන ලදී.

විපක්ෂය ට්‍රිපොලි අත්පත් කර ගැනීමෙන් පසු රටෙන් පලා යෑමට උත්සාහ කළ සයිෆ් අල්-ඉස්ලාම් ගඩාෆි අල්ලාගෙන 2011 දී සින්තාන් හි සිරගත කරන ලදී.

ඔහු 2017 දී පොදු සමාවක් යටතේ නිදහස් කරන ලද අතර එතැන් සිට සින්තාන් හි ජීවත් විය.