January 14, 2026
2025 දී මහනුවර දිස්ත්රික්කයේ මත්ද්රව්යවලට ඇබ්බැහිවීම් පෙර වසරට සාපේක්ෂව පස්ගුණයකින් වැඩි වී ඇති බව මධ්යම පළාත භාර ජ්යෙෂ්ඨ නියෝජ්ය පොලිස්පති ලලිත් පතිනායක ඊයේ පැවසීය.
මහනුවර දිස්ත්රික් ලේකම් කාර්යාලයේ පැවති මත්ද්රව්ය උවදුර තුරන්කිරීම අරමුණු කරගත් ‘රටම එකට’ ජාතික මෙහෙයුම අමතමින් ජ්යෙෂ්ඨ නියෝජ්ය පොලිස්පති පතිනායක පැවසුවේ, පොලිස් වැටළීම් වාර්තා මගින් දිස්ත්රික්කයේ මත්ද්රව්ය සංසරණය සහ භාවිතයේ තියුණු වැඩිවීමක් පෙන්නුම් කරන බවයි.
“වැටළීම් වාර්තාවලට අනුව, 2025 දී මහනුවර කොට්ඨාශයේ හෙරොයින් අත්අඩංගුවට ගැනීම් කිලෝග්රෑම් 1 යි ග්රෑම් 200 කින් පමණ වැඩි වී තිබෙනවා. අයිස් භාවිතය කිලෝග්රෑම් 3 යි ග්රෑම් 23 දක්වා පස් ගුණයකින් වැඩි වී තිබෙනවා” ඔහු පැවසීය.
මෑතකදී මහනුවර මගී බස් රථ තුනක් අහඹු ලෙස පරීක්ෂා කිරීමේදී රියදුරන් තිදෙනෙකු සහ කොන්දොස්තරවරුන් දෙදෙනකු හෙරොයින් සහ අයිස් භාවිත කර සිටි බව සොයාගත් බවත්, එය මහජන ආරක්ෂාව පිළිබඳ බරපතල ගැටළු මතු කරන බවත් ඔහු හෙළිකළේය.
ජ්යෙෂ්ඨ නියෝජ්ය පොලිස්පති පතිනායක අනතුරු ඇඟවූයේ, ඉහළ සමාජ තනතුරු දරන කාන්තාවන් සහ පාසල් සිසුන් මත්ද්රව්යවලට ඇබ්බැහි වීමේ වැඩිවන ප්රවණතාවක් බවයි.
අන්තර්ජාතික මත්ද්රව්ය ජාවාරම සඳහා ශ්රී ලංකාව වැඩි වැඩියෙන් කේන්ද්රස්ථානයක් බවට පත්ව ඇති බවත්, නීතිය ක්රියාත්මක කිරීම පමණක් මෙම උවදුර තුරන් කළ නොහැකි බවත් ඔහු අවධාරණය කළේය. “මෙම තර්ජනය තුරන් කිරීම සඳහා සමස්ත සමාජයේම සහයෝගය අත්යවශ්යයි,” ඔහු පැවසීය.
මහනුවර ක්රියාත්මක වන මත්ද්රව්ය ජාල කිහිපයක් විදේශයන්ගෙන් පාලනය වන බවත්, “නුවර අක්කා,” “මාතලේ අක්කා,” සහ “කුඩු සයිමා” යන පුද්ගලයින් දිස්ත්රික්කයට මත්ද්රව්ය සැපයීමේ ප්රධාන පුද්ගලයන් ලෙස පොලිසිය විසින් හඳුනාගෙන ඇති බවත් හෙතෙම පැවසීය.
