බංග්ලාදේශ ප්‍රිමියර් ලීග් (BPL) කණ්ඩායම් සහකාර පුහුණුකරුවකු සහ බංග්ලාදේශ ක්‍රිකට් මණ්ඩලයට (BCB) අනුබද්ධ විශේෂඥ වේගපන්දු යැවීමේ පුහුණුකරුවකු වන මහබුබ් අලි සාකි, සෙනසුරාදා තරඟයක් ආරම්භ වීමට මොහොතකට පෙර හෘදයාබාධයකින් මියගොස් තිබේ.

ඩකා කැපිටල්ස් කණ්ඩායම සිල්හෙට් හි 2026 BPL T20 තරගාවලියේ ආරම්භක තරගයට මොහොතකට පෙර සාකි පිටියේදී ඇදවැටී තිබේ.

ඔහුව ඉක්මනින් රෝහල්ගත කරන ලද අතර, පසුව ඔහු මියගිය බව ප්‍රකාශ කරන ලදී. ඔහුගේ වයස අවුරුදු 59 කි.

දෙසැම්බර් 27 වැනි දින පස්වරු 1:00 ට පමණ සිල්හෙට් හිදී සාකි මියගිය බව බංග්ලාදේශ ක්‍රිකට් මණ්ඩලය නිවේදනයක් නිකුත් කරමින් තහවුරු කළේය.

“BCB ක්‍රීඩා සංවර්ධන දෙපාර්තමේන්තුවේ විශේෂඥ වේගපන්දු යැවීමේ පුහුණුකරු සහ බංග්ලාදේශ ප්‍රිමියර් ලීගයේ ඩකා කැපිටල්ස් හි සහකාර පුහුණුකරු මහබුබ් අලි සාකිගේ අභාවය පිළිබඳව බංග්ලාදේශ ක්‍රිකට් මණ්ඩලය දැඩි ශෝකය පළකරයි,” යනුවෙන් එම නිවේදනයේ සඳහන් වේ.

බංග්ලාදේශයේ වේග පන්දු යැවීමේ සංවර්ධනය සඳහා ඔහුගේ දිගුකාලීන දායකත්වය වෙනුවෙන් සාකි පුළුල් ලෙස ගෞරවයට පාත්‍ර වූ අතර, BCB හි ක්‍රීඩා සංවර්ධන වැඩසටහන් හරහා නැගී එන ක්‍රීඩකයන් සමඟ සමීපව කටයුතු කළේය.

බංග්ලාදේශ ප්‍රිමියර් ලීග් තරගාවලිය මේ වන විට සිල්හෙට් හිදී පැවැත්වෙන අතර, සහභාගී වන කණ්ඩායම් අතර ඩකා කැපිටල්ස් ද සිටී.