ගම්පහ පොලිස් ස්ථානයේ අපරාධ අංශයේ ස්ථානාධිපතිවරයා අල්ලස් ලබාගැනීමේ චෝදනාවක් සම්බන්ධයෙන් ජනවාරි 06 වැනිදා දක්වා රක්ෂිත බන්ධනාගාරගත කිරීමට කොළඹ මහේස්ත්‍රාත් අධිකරණය නියෝග කර තිබේ.

අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් ඊයේ අත්අඩංගුවට ගත් සැකකරු අද (26) කොළඹ මහේස්ත්‍රාත් අධිකරණයට ඉදිරිපත් කර තිබිණි.

අල්ලස් හෝ දූෂණ චෝදනා විමර්ශන කොමිෂන් සභාවට අනුව, රුපියල් ලක්ෂ 3ක අල්ලසක් ඉල්ලා ලබාගැනීම සම්බන්ධයෙන් ඔහුට චෝදනා එල්ල වී තිබේ.

ජා-ඇල, දඬුගම ප්‍රදේශයේ ව්‍යාපාරිකයකු විසින් කරන ලද පැමිණිල්ලකට අනුව මෙම මෙහෙයුම ක්‍රියාත්මක කර තිබිණි.

පැමිණිල්ලේ සඳහන් වූයේ, වෙනත් පුද්ගලයෙකු විසින් සොරකම් කරන ලද රන් ආභරණ මිලදී ගත් බව කියන සිද්ධියක් සඳහා පැමිණිලිකරුට එරෙහිව නීතිමය පියවර ගැනීමෙන් වැළකී සිටීමට පොලිස් නිලධාරියා අල්ලසක් ඉල්ලා සිටි බවයි.

සැකකරු නඩුව අධිකරණයට ගෙන ඒම වැළැක්වීම සඳහා රුපියල් ලක්ෂ 3ක් සහ රන් පවුම් තුන්කාලක් ඉල්ලා සිටි බව කියනු ලැබේ.

රුපියල් 250,000ක මූලික ගෙවීමක් ලබා ගනිමින් සිටියදී, අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් සැකකරු අත්අඩංගුවට ගෙන තිබේ.

නඩු විභාගය අතරතුර, සිද්ධිය සම්බන්ධයෙන් පරීක්ෂණ සිදුවෙමින් පවතින බව අල්ලස් හෝ දූෂණ චෝදනා විමර්ශන කොමිෂන් සභාව අධිකරණයට දැනුම් දී ඇත.

සැකකරුගේ දියණිය අ.පො.ස. උසස් පෙළ විභාගයට පෙනී සිටීමට නියමිත බවත්, ඔහුගේ අනෙක් දරුවා පෙබරවාරි මාසයේ අ.පො.ස. සාමාන්‍ය පෙළ විභාගයට සූදානම් වන බවත් සඳහන් කරමින්, සැකකරුට ඇප ලබාදෙන ලෙස නීතිඥවරයා අධිකරණයෙන් ඉල්ලා සිටියේය.

කෙසේවෙතත්, පසුව ප්‍රධාන මහේස්ත්‍රාත්වරයා ඉදිරියේ විධිමත් ඇප අයදුම්පතක් ගොනුකරන බව විත්තිකරු පෙන්වා දුන්නේය.

ඒ අනුව, ඉදිරිපත් කරන ලද කරුණු සලකා බැලීමෙන් පසු, කොළඹ අතිරේක මහේස්ත්‍රාත් ලහිරු වරුසවිතාන සැකකරු ජනවාරි 6 වැනිදා දක්වා රක්ෂිත බන්ධනාගාරගත කිරීමට නියෝග කළේය.