කිඹුල් පැටවකු නීති විරෝධී ලෙස ළඟ තබා ගැනීම සම්බන්ධයෙන් අලුත්ගම, කළුවාමෝදර ප්‍රදේශයේ පදිංචි වයස අවුරුදු 44ක පුද්ගලයකු වනජීවී නිලධාරීන් විසින් අත්අඩංගුවට ගෙන තිබේ.

හික්කඩුව ජාතික වනෝද්‍යාන මූලස්ථානයට ලැබුණු තොරතුරු මත අත්අඩංගුවට ගත් සැකකරු කළුතර මහේස්ත්‍රාත්වරයා හමුවට අද ඉදිරිපත් කළ අතර, එහිදී ඔහුට රුපියල් 70,000ක දඩයක් ගෙවීමට නියෝග කෙරිණි.

කිඹුල් පැටවා සුදුසු පරිසරයකට මුදා හැර වාර්තාවක් ඉදිරිපත් කරන ලෙස ද මහේස්ත්‍රාත්වරයා අත්තිඩිය වනජීවී පශු වෛද්‍යවරයාට නියෝග කළේය.

වනජීවී සංරක්ෂණ දෙපාර්තමේන්තුව ප්‍රකාශ කළේ කිඹුලන් වනජීවී හා වෘක්ෂලතා ආරක්ෂක ආඥා පනත යටතේ දැඩි ලෙස ආරක්ෂා කරන ලද උරගයන් බවයි.

විදේශීය සංචාරකයන්ට ප්‍රදර්ශනය කර මුදල් උපයා ගැනීම සඳහා ඇතැම් අය කිඹුල් පැටවුන් ළඟ තබා ගන්නා බව නිරීක්ෂණය වී ඇති බව දෙපාර්තමේන්තුව නිවේදනයක් නිකුත් කරමින් කියා සිටියේය.

එවැනි වැරදිකරුවන් අත්අඩංගුවට ගැනීම සඳහා වනජීවී නිලධාරීන් අඛණ්ඩව වැටලීම් සිදු කරන බව වනජීවී සංරක්ෂණ දෙපාර්තමේන්තුව වැඩිදුරටත් පැවසීය.