ඉන්දියාව සහ ඕමානය අතර නිදහස් වෙළඳ ගිවිසුමකට අත්සන් තැබීමට නියමිත බව වාර්තා වේ.

ඉන්දීය ජනමාධ්‍ය වාර්තා කළේ ඉන්දීය අග්‍රාමාත්‍ය නරේන්ද්‍ර මෝදිගේ එළඹෙන ඕමාන සංචාරයට සමගාමීව දෙපාර්ශවය එම ගිවිසුමට එළඹෙනු ඇති බවයි.

ඒ වෙනුවෙන් ඉන්දීය අග්‍රාමාත්‍යවරයාගේ රටවල් තුනක විදෙස් සංචාරයක් ලබන 15 වනදා ආරම්භ වේ.

එහිදී අග්‍රාමාත්‍යවරයා පළමුව ජෝර්දානයටත්, පසුව ඉතියෝපියාවටත් අනතුරුව ඕමානයටත් පැමිණීමට නියමිත අතර මෙම සංචාරය දෙසැම්බර් 18 වන දින අවසන් වේ.

මෙම සංචාරයේ අරමුණ වන්නේ ඉන්දියාව සහ එම රටවල් තුන සමඟ ඇති වෙළඳ හා ආරක්ෂක සබඳතා වැඩි දියුණු කිරීම මෙන්ම බටහිර ආසියාවේ සහ අප්‍රිකාවේ එහි උපායමාර්ගික පැවැත්ම ශක්තිමත් කිරීමයි.

බටහිර ආසියාවේ භූ දේශපාලනික වෙනසක් මධ්‍යයේ මෙම සංචාරයේදී ඉන්දියාව ත්‍රස්තවාදයට එරෙහි වීම, බලශක්ති හවුල්කාරිත්වයන් සහ ඉහළ යන ආර්ථික අවස්ථා පිළිබඳව ද සාකච්ඡා අවධානය යොමු කරනු ඇතැයි වාර්තා වේ.

ඉන්දියාව සහ ජෝර්දානය ඔවුන්ගේ රාජ්‍ය තාන්ත්‍රික සබඳතා ස්ථාපිත කිරීමේ 75 වන වසර සනිටුහන් කරන අවස්ථාවේදී මෙම සංචාරය සිදු වේ.

අගමැති මෝදි සහ අබ්දුල්ලා රජු ඉන්දියා-ජෝර්දාන ව්‍යාපාරික උත්සවය ඇමතීමට නියමිතය.