වෙන්නප්පුව ලුණුවිල ප්‍රදේශයේදී ගිං ඔයට කඩා වැටුණු ශ්‍රී ලංකා ගුවන් හමුදාවේ බෙල් 212 යානය අනතුරට පත්වීමට පෙර එහි තාක්ෂණික දෝෂයක් ඇති බව ප්‍රධාන නියමුවා සහ තමන් වටහා ගත් බව ගුවන් යානයේ සහාය නියමු, ෆ්ලයිට් ලුතිනන් එරංග චාමර ඒකනායක අධිකරණයේදී ප්‍රකාශ කර තිබේ.

හෙලිකොප්ටරයේ ප්‍රධාන නියමුවා මිය යෑමට හේතු වූ අදාළ අනතුර සම්බන්ධයෙන් පැවති විමර්ශනයේදී මාරවිල මහේස්ත්‍රාත් අධිකරණය හමුවේ ඔහු මෙම ප්‍රකාශය කළේය.

ව්‍යසනයෙන් විපතට පත් වූවන්ට සහාය වීම සඳහා සහන මෙහෙයුම්වල නිරත වූ ශ්‍රී ලංකා ගුවන් හමුදාවේ බෙල් 212 හෙලිකොප්ටරය නොවැම්බර් 30 වැනිදා වෙන්නප්පුව ලුණුවිල ප්‍රදේශයේදී ගිං ඔයට කඩා වැටිණි.

අනතුරින් ප්‍රධාන නියමුවා වූ 41 හැවිරිදි වින්ග් කමාන්ඩර් නිර්මාල් සියඹලාපිටිය මිය ගියේය.

ගුවන් යානා අනතුරට අදාළ නඩුව මාරවිල මහේස්ත්‍රාත් අධිකරණයේදී ඊයේ විභාගයට ගැනිණි.

අධිකරණය හමුවේ සාක්ෂි දෙමින් සහකාර ෆ්ලයිට් ලුතිනන් එරංග චාමර ඒකනායක මෙසේ පැවසීය:

“30 වැනිදා සවස 5ට පමණ, ශ්‍රී ලංකා ගුවන් හමුදාවෙන් ලැබුණු නියෝග අනුව, ආපදාවට ලක් වූ ජනතාවට වියළි සලාක ලබා දීම සඳහා අපි කටුනායක ගුවන් හමුදා කඳවුරෙන් බෙල් 212 හෙලිකොප්ටරයකින් පිටත් වුණා. වෙන්නප්පුව හරහා පියාසර කරන අතරතුර, අපි ගුවන් යානය යම් දුරකට පහත් කරද්දී, ගිං ඔය පාලමේ සහ අවට ප්‍රදේශයේ සිටි අය ආධාර ඉල්ලා දෑත් ඔසවා සිටියා. විශාල පිරිසක් එහි රැස්ව සිටීම සහ අසල අධි වෝල්ටීයතා විදුලි රැහැන් තිබීම නිසා ගුවන් යානය පාලම මතට හෝ මාර්ගයට ගොඩබෑමට නොහැකි වුණා. කොහොම වුණත් අපට සංඥා කරමින් සිටි පුද්ගලයන්ට වියළි සලාක අඩංගු පාර්සලයක් අපි දැම්මා. සුදුසු ස්ථානයකට ගුවන් යානය ගොඩබෑමට උත්සාහ කරන අතරතුර, ප්‍රධාන නියමු නිර්මාල් සියඹලාපිටියට සහ මට තේරුණා යානයේ තාක්ෂණික දෝෂයක් ඇති බව. ප්‍රධාන නියමුවා හෙලිකොප්ටරය නිසි ගොඩබෑමේ ස්ථානයකට ආරක්ෂිතව මෙහෙයවීමට උත්සාහ කරද්දී යානය හදිසියේම ගිං ඔයට කඩා වැටුණා. මමයි අනෙක් ගුවන් හමුදා නිලධාරීන් දෙන්නයි එළියට ඇවිත් හිරවෙලා හිටපු ප්‍රධාන නියමුවාගේ පටි ඉක්මනින් ඉවත් කරලා මාරවිල මූලික රෝහලට ගෙන ගියා.”

ඉදිරිපත් කරන ලද සාක්ෂි සළකා බැලීමෙන් පසු, මාරවිල මහේස්ත්‍රාත් දිනිදු සමරසිංහ පරීක්ෂණ විධිමත් ආකාරයකින් කරගෙන යන ලෙස උපදෙස් දුන් අතර, පරීක්ෂණවල ප්‍රගතිය සමාලෝචනය කිරීම සඳහා නඩුව පසු දිනක නැවත කැඳවන ලෙස නියෝග කළේය.