වායු තත්ත්ව දර්ශකයේ (AQI) නවතම දත්ත අනුව මෙරට ප්‍රදේශ කිහිපයක වායු ගුණාත්මකභාවය සෞඛ්‍යයට අහිතකර මට්ටම දක්වා ළඟා වී තිබේ.

එලෙස බලපෑමට ලක් වූ ප්‍රදේශ අතර කදුරුවෙල, හලාවත, අකරගම, වඳුරාගල, දිගන, මාදම්පාගම, හුංගම, අක්කරෙයිපත්තු, කලවාන, මුල්ලියාවලෙයි, පන්නන්කන්ඩි, අඩම්පන් සහ උප්පවේලි මෙන්ම යාපනයේ සහ කොළඹ ද වේ.

වායු ගුණාත්මක දර්ශකයට අනුව, මෙම ප්‍රදේශවල වායු දූෂක මට්ටම දිගු කලක් නිරාවරණය වීම මගින් සෞඛ්‍ය අවදානම් ඇති කළ හැකි තත්වය දක්වා පැමිණ ඇති අතර, විශේෂයෙන් ළමුන්, වැඩිහිටියන් සහ ශ්වසන හෝ හෘද රෝග ඇති අවදානම ඉහළ කාණ්ඩයට අයත් වේ.

නිර්දේශිත ක්‍රියාමාර්ග අතරට එළිමහනේ සිදුකරන ක්‍රියාකාරකම් අඩු කිරීම, අපිරිසිදු එළිමහන් වාතය නිවෙස්වලට ඇතුළු වීම වැළැක්වීම සඳහා කවුළු වසාතබා ගැනීම සහ පිටතට යන විට මුව ආවරණ පැළඳීම සිදුකරන ලෙස බලධාරීන් උපදෙස් ලබා දෙයි.

මේ අතර, ඉන්දියාවේ ඉකුත් සති අන්තයේදී නවදිල්ලියේ වායු ගුණාත්මකභාවය දැඩි ලෙස පිරිහී තිබූ අතර, නවදිල්ලිය ඝන දුමාර තට්ටුවකින් වැසීගොස් තිබුණේ අනතුරුදායක මට්ටම් කරා ළඟාවෙමින් ය.

අද උදෑසන නවදිල්ලි නගරයේ වායු ගුණාත්මක භාවය 344 ක් වූ අතර එය ලෝක සෞඛ්‍ය සංවිධානයේ මාර්ගෝපදේශයන්ට අනුව දරුණු සහ හුස්ම ගැනීමට අනතුරුදායක ලෙස වර්ගීකරණය කර ඇත.

ඉන්දියාවේ වායු ගුණාත්මකභාවය පිරිහීම මහජන විරෝධතා ද ඇති කර තිබේ.

ඊයේ එරට පරිසර ක්‍රියාකාරීන් ඇතුළු සිය ගණනක පදිංචිකරුවන් නවදිල්ලියට රැස් වී මෙම තත්වය වැළැක්වීම සඳහා හදිසි ක්‍රියාමාර්ග ගන්නා ලෙස රජයට බලකරමින් විරෝධතා පැවැත්වීය.

බොහෝදෙනෙකු මුව ආවරණ පැළඳ “මට හුස්ම ගැනීම අපහසුයි” යනුවෙන් සඳහන් පුවරු රැගෙන ගියහ.