November 9, 2025
ලබන වසරේ ශ්රී ලංකාවේ පාසල් විෂය මාලාවට ඇතුළත් කිරීමට සූදානම් වන ‘නුසුදුසු’ යැයි කියන ලිංගික අධ්යාපන වැඩසටහනක් පිළිබඳ කොළඹ අගරදගුරු අති උතුම් මැල්කම් කාදිනල් රංජිත් හිමිපාණන් කණස්සල්ල පළ කර තිබේ.
මීරිගම පිහිටි ප්රතිසංස්කරණය කරන ලද ශාන්ත ස්ටීවන් දේවස්ථානය නැවත විවෘත කිරීමේ උත්සවයේදී අදහස් දක්වමින් කාදිනල් රංජිත් හිමිපාණන් පැවසුවේ සැලසුම් කළ අධ්යාපන ප්රතිසංස්කරණ යටතේ ජනවාරි මාසයේ ආරම්භ කිරීමට නියමිත මෙම වැඩසටහන අන්තර්ජාතික සංවිධානවල බලපෑම යටතේ සංවර්ධනය වෙමින් පවතින බවයි.
නව විෂය මාලාවේ අරමුණ වන්නේ 6 ශ්රේණියේ සිට ලිංගික අධ්යාපනය හඳුන්වා දීම බවත්, ගුරුවරුන් පුහුණු කිරීම සහ සම්මන්ත්රණ සංවිධානය කිරීම බවත් උන්වහන්සේ පැවසීය.
“මේක ඇත්තටම අධ්යාපනයද? එවැනි කරුණු තම දරුවන්ට නියම වේලාවට ඉගැන්වීම මාපියන්ගේ වගකීම නෙවෙයි ද ?” යනුවෙන් උන්වහන්සේ ප්රශ්න කළේය.
මෙම වැඩසටහනට සමලිංගික සබඳතා සහ උපත් පාලනය පිළිබඳ පාඩම් ඇතුළත් වන බවත්, එක්සත් ජාතීන්ගේ ජනගහන අරමුදල (UNFPA) වැනි විදේශීය ආයතන විසින් ඒවාට සහාය දක්වන බවත් කාදිනල් රංජිත් හිමිපාණන් කියා සිටියේය.
“ඔවුන් රජයට සහ අධ්යාපන අමාත්යාංශයට මුදල් ලබා දී, පොත් මුද්රණය කර, දැන් අපේ දරුවන් නොමඟ යවන සැලැස්මක් ක්රියාත්මක කරමින් සිටිනවා” යනුවෙන් උන්වහන්සේ පැවසීය.
ජනවාරි 27 වැනිදා ආරම්භ වීමට නියමිත මෙම වැඩසටහන රටේ සංස්කෘතික හා සදාචාරාත්මක වටිනාකම්වලට හානි කළ හැකි බවට කාදිනල් රංජිත් හිමිපාණන් අනතුරු ඇඟවීය.
“මෙය අපේ දරුවන් විනාශ කිරීමට දරන උත්සාහයක්. ආගම හා සදාචාරය අහිමි වූ දිරාපත් වූ බටහිර ලෝකයේ වටිනාකම් අපේ රටට ගෙන ඒමට ඔවුන් උත්සාහ කරනවා,” යැයි උන්වහන්සේ පැවසීය.
සැලසුම් කර තිබෙන මෙම පාඩම් නතර කරන ලෙස කාදිනල් රංජිත් හිමිපාණන් රජයෙන් ඉල්ලා සිටි අතර අමාත්යාංශ නිලධාරීන් විසින් එවැනි වැඩසටහන් ඉදිරියට ගෙන යෑම වැළැක්වීමට පියවර ගන්නා ලෙස ද ජනාධිපතිවරයාගෙන් ඉල්ලා සිටියේය.
“අහිංසක දරුවන් නොමඟ යවන ආකාරයෙන් අධ්යාපන අමාත්යාංශය ක්රියා කරනවා නම්, අපි එය සම්පූර්ණයෙන්ම ප්රතික්ෂේප කළ යුතුයි,” යනුවෙන් උන්වහන්සේ තවදුරටත් පැවසීය.
