November 7, 2025
ශ්රී ලාංකික ධීවරයන්ට මහ මුහුදේදී සිදුවන ජීවිත හානි වැළැක්වීම සඳහා ඉන්දීය අභ්යවකාශ පර්යේෂණ සංවිධානයේ (ISRO) තාක්ෂණය ලබා දෙන ලෙස සමගි ජන බලවේගයේ පාර්ලිමේන්තු මන්ත්රී චිත්රාල් ප්රනාන්දු ශ්රී ලංකාවේ ඉන්දීය මහ කොමසාරිස් සන්තෝෂ් ජා හමුවී ඉල්ලා සිටියේය.
සමාජ මාධ්ය ඔස්සේ ප්රකාශයක් නිකුත් කරමින් මන්ත්රී ප්රනාන්දු පැවසුවේ, පසුගිය ජුනි මාසයේ දී තරුණ දේශපාලන නායකයන්ගේ ඉන්දීය සංචාරය අතරතුර, බැංගලෝරයේ ඉන්දීය අභ්යවකාශ පර්යේෂණ සංවිධානයේ නැරඹීමට තමාට අවස්ථාව ලැබුණු බවත්, අභ්යවකාශ ගවේෂණයට අමතරව, එම ආයතනය මහ මුහුදේ ධීවරයන් මුහුණ දෙන විපත් වැළැක්වීම සඳහා චන්ද්රිකා තාක්ෂණය භාවිත කරන DAT-SG පද්ධතිය සංවර්ධනය කර සාර්ථකව භාවිත කරන බවත් නිරීක්ෂණය කළ බවයි.
“මෙම කාරණය තවදුරටත් අධ්යයනය කිරීමෙන් පසු, මම ඉන්දීය මහ කොමසාරිස් සන්තෝෂ් ජා හමුවී පුත්තලම දිස්ත්රික්කයේ වෙරළබඩ ප්රදේශවල නියමු පරීක්ෂණයක් ආරම්භ කර ශ්රී ලාංකික ධීවරයන්ගේ ප්රයෝජනය සඳහා මෙම තාක්ෂණය ලබා දීමට පියවර ගන්නා ලෙස ඉල්ලා සිටියා,” යනුවෙන් ඔහු පැවසීය.
ඊට අමතරව, ධීවර කටයුතු සඳහා පහසුකම් සපයන ඉන්දියානු NAVIC තාක්ෂණික මෘදුකාංගය ශ්රී ලාංකික ධීවර ප්රජාවට ලබා දෙන ලෙස ඉන්දීය මහ කොමසාරිස්වරයාගෙන් ඉල්ලා සිටි බව පාර්ලිමේන්තු මන්ත්රී ප්රනාන්දු වැඩිදුරටත් පැවසීය.
