ප්‍රංශයේ පැරිස් නුවර ලූවර් කෞතුකාගාරයේ සිදු වූ සොරකම ලොව පුරා අවධානය දිනාගත් අතර, ඊට සම්බන්ධ වූ පුද්ගලයන් ඉතා ඉක්මනින් පොලිසිය විසින් අත්අඩංගුවට ගන්නා ලදී.

එහෙත් මීට වසර 12 කට පෙර කොළඹ ජාතික කෞතුකාගාරයේ සිදු වූ සොරකමට සම්බන්ධ වූයේ කවුරුන්ද යන ප්‍රශ්නය තවමත් අවිනිශ්චිතව පවතී.

2024 දෙසැම්බර් 31 වැනි දිනෙන් අවසන් වූ වර්ෂය සඳහා ජාතික කෞතුකාගාර දෙපාර්තමේන්තුවේ මූල්‍ය ප්‍රකාශනවල නවතම විගණන වාර්තාවේ සඳහන් වන ආකාරයට, 2012 මාර්තු 16 වැනි දින කෞතුකාගාරයෙන් ඇස්තමේන්තුගත රුපියල් 4,440,140 ක් වටිනා කෞතුක වස්තු 221 ක් සොරකම් කර වසර 12 ක් ගතවී ඇතත්, නඩුව තවමත් ආරම්භ වී නොමැති බව විගණකාධිපති දෙපාර්තමේන්තුව නිරීක්ෂණය කර ඇත.

විත්තිකරුවන්ට එරෙහිව චෝදනා ගොනු නොකිරීම සම්බන්ධයෙන් වාර්තාව නීතිපති දෙපාර්තමේන්තුවට එහි දොස් පවරා ඇත.

කරුණු කඩිනම් කිරීම සඳහා පියවර ගන්නා ලෙස විගණකවරයා ඉල්ලා ඇත.