කොළඹ විහාරමහාදේවි උද්‍යානයේදී හය හැවිරිදි දැරියක් නුසුදුසු ලෙස ස්පර්ශ කිරීමේ චෝදනාව මත අත්අඩංගුවට ගත් පෝනි හසුරුවන්නකු අද මහේස්ත්‍රාත් අධිකරණයට ඉදිරිපත් කරන ලදී.

වින්දිතයාගේ පියා විසින් කුරුඳුවත්ත පොලිසියට කරන ලද පැමිණිල්ලකට අනුව සැකකරු අත්අඩංගුවට ගන්නා ලදී.

පැමිණිල්ලට අනුව, ඔක්තෝබර් 26 වැනිදා, පියා තම දියණියන් දෙදෙනා සමඟ විනෝදය සඳහා විහාරමහාදේවි උද්‍යානයට ගොස් තිබේ.

දැරියන් මාරුවෙන් මාරුවට පෝනියා පිට නැගී ඇති අතර අවසාන වටයේදී, සැකකරු එක් දැරියකගේ පිටුපස ස්පර්ශ කර ඇති බව කියනු ලැබේ.

සිද්ධිය දුටු පියා වහාම තම දියණිය රැගෙන ගොස් පොලිසියට වාර්තා කර ඇත.

පසුව කුරුඳුවත්ත පොලිසිය සැකකරු අත්අඩංගුවට ගෙන අධිකරණයට ඉදිරිපත් කළේය.

සැකකරු වෙනුවෙන් පෙනී සිටි විත්තියේ නීතිඥවරයා අධිකරණයට කියා සිටියේ තම සේවාදායකයා කිසිදු ආකාරයක අපයෝජනයක් සිදු කර නොමැති බවත්, දරුවා ගමන අතරතුර පෝනියා පිටෙන් වැටීම වැළැක්වීම සඳහා පමණක් රඳවාගෙන සිටි බවත්ය.

ඉදිරිපත් කරන ලද කරුණු සළකා බැලීමෙන් පසු, සැකකරු රුපියල් 200,000 ශරීර ඇප දෙකක් මත නිදහස් කිරීමට මහේස්ත්‍රාත්වරයා නියෝග කළේය