October 17, 2025
ඒකාබද්ධ සෞඛ්‍ය සේවා සහ විශ්වීය සෞඛ්‍ය ආවරණ වැඩසටහන ශක්තිමත් කිරීම සඳහා සහාය ලබාගැනීමට, ශ්‍රී ලංකා රජය ආසියානු සංවර්ධන බැංකුවෙන් (ADB) මූල්‍ය ආධාර ලබාගෙන ඇත.
මෙම ගිවිසුමට ADB හි නිත්‍ය සාමාන්‍ය ප්‍රාග්ධන සම්පත් යටතේ ඇමරිකානු ඩොලර් මිලියන 100ක ණයක් සහ වසංගත වැළැක්වීම, සූදානම සහ ප්‍රතිචාර භාර අරමුදලෙන් (වසංගත අරමුදල) බාහිරව මූල්‍යකරණය කරන ලද ඇමරිකානු ඩොලර් මිලියන 6.9 ක ප්‍රදානයක් ඇතුළත් වේ.
ප්‍රතිඵල මත පදනම් වූ ණය දීමේ ක්‍රමය යටතේ අරමුදල් සපයනු ලැබේ.
පළමු යොමුකිරීමේ සත්කාරය ලෙස ද්විතීයික සෞඛ්‍ය සේවාවන්හි කාර්යක්ෂමතාව සහ ගුණාත්මකභාවය වැඩිදියුණු කිරීම සඳහා වන ජාතික උපායමාර්ගික රාමුවට සහාය වීම, විශ්වීය සෞඛ්‍ය ආවරණය කරා ප්‍රගතිය සහතික කිරීම මෙම වැඩසටහනේ අරමුණයි.
එය පළමු යොමුකිරීමේ සත්කාර සේවා වැඩි දියුණු කිරීම, වසංගත වැළැක්වීම, සූදානම සහ ප්‍රතිචාරය ශක්තිමත් කිරීම සහ සෞඛ්‍ය අංශයේ තාක්ෂණික ධාරිතාව වැඩිදියුණු කිරීම සහ ඖෂධ සැපයුම් දාමය කළමනාකරණය කිරීම වැනි ප්‍රධාන ක්ෂේත්‍ර තුනක් කෙරෙහි අවධානය යොමුකරයි.
සෞඛ්‍ය හා ජනමාධ්‍ය අමාත්‍යාංශය ව්‍යාපෘතිය ක්‍රියාත්මක කිරීමේ ප්‍රධාන ආයතනය ලෙස කටයුතු කරන අතර, පළාත් සෞඛ්‍ය සේවා දෙපාර්තමේන්තු නවයම ක්‍රියාත්මක කිරීමේ ආයතන ලෙස කටයුතු කරයි.
ශ්‍රී ලංකා රජය වෙනුවෙන් මුදල්, සැලසුම් සහ ආර්ථික සංවර්ධන අමාත්‍යාංශයේ ලේකම් ආචාර්ය හර්ෂණ සූරියප්පෙරුම සහ ආසියානු සංවර්ධන බැංකුව නියෝජනය කරමින් ආසියානු සංවර්ධන බැංකුවේ ශ්‍රී ලංකා නේවාසික මෙහෙවරෙහි දේශීය අධ්‍යක්ෂ ටකෆුමි කඩෝනෝ විසින් අද දින කොළඹ මුදල් අමාත්‍යාංශයේදී ණය සහ ප්‍රදාන ගිවිසුම් අත්සන් කරන ලදී.
