ඉදිරි අධ්‍යාපන ප්‍රතිසංස්කරණ යටතේ පාසල් වේලාව පස්වරු 2 දක්වා දීර්ඝ කිරීමට නියමිත බැවින්, සිසුන්ගේ ප්‍රවාහනය සඳහා අවශ්‍ය වෙනස්කම් පිළිබඳව ප්‍රවාහන, මහාමාර්ග සහ නාගරික සංවර්ධන අමාත්‍යාංශයට දැනුම් දී ඇති බව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය පවසයි.

අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයේ ලේකම් නාලක කළුවැව පවසන්නේ, පාසල් දරුවන්ගේ ප්‍රවාහනය සම්බන්ධයෙන් අදාළ පාර්ශවයන් සමඟ මූලික සාකච්ඡාවක් දැනටමත් පවත්වා ඇති බවත්, ඉදිරියේදී තවත් සාකච්ඡා වටයක් පැවැත්වෙන බව‍යි.

“මේ සම්බන්ධයෙන් අපි දැනටමත් අවශ්‍ය තොරතුරු ලබා දී තිබෙනවා. ප්‍රවාහන, මහාමාර්ග සහ නාගරික සංවර්ධන අමාත්‍යාංශය දැන් තත්ත්වය සමාලෝචනය කරමින් ඉන්නේ. නව පාසල් කාලසටහන ක්‍රියාත්මක වූ පසු ප්‍රවාහන විධිවිධාන පිළිබඳ අවශ්‍යතා අපි දැනුම් දී තිබෙනවා. ප්‍රවාහන, මහාමාර්ග සහ නාගරික සංවර්ධන අමාත්‍යාංශය අදාළ පාර්ශවයන් සමඟ සාකච්ඡා පවත්වා ඒ අනුව ප්‍රතිචාර දැක්වීමට නියමිතයි.” ඔහු සඳහන් කරයි.

2026 දී ක්‍රියාත්මකවීමට නියමිත යෝජිත අධ්‍යාපන ප්‍රතිසංස්කරණ යටතේ, 1 සිට 6 ශ්‍රේණි දක්වා පාසල් පැවැත්වෙන වේලාව පෙ.ව. 7.30 සිට ප.ව. 2 දක්වා දීර්ඝ කෙරෙන අතර, එය වත්මන් පාසල් පැවැත්වෙන කාලසීමාව වන ප.ව. 1:30 සිට මිනිත්තු 30ක වැඩිවීමකි.

සංශෝධිත කාලසටහන මඟින් දිගු මිනිත්තු 50ක කාල පරිච්ඡේද හඳුන්වාදීමෙන් කොවිඩ්-19 වසංගතය වැනි පෙර බාධාවන් හේතුවෙන් අහිමි වූ අධ්‍යයන කාලය සපුරාලීමට අපේක්ෂා කෙරේ.