මියන්මාරයේ චෞන්ග් යූ නගරයේ බෞද්ධ උත්සවය සැමරීමට රැස්ව සිටි ජනතාව වෙත මෝටර් බලයෙන් ක්‍රියාත්මක වන බෝම්බ දෙකක් හෙළීමෙන් අවම වශයෙන් පුද්ගලයන් 40 දෙනකු මියගොස් තවත් විශාල පිරිසක් තුවාල ලැබූ බව බීබීසී පුවත් සේවය වාර්තා කර තිබේ.

ජාතික නිවාඩු දිනයක් වන සහ බෞද්ධ මූලයන් සහිත ‘තඩින්යුට් උත්සවය’ සැමරීම සඳහා සඳුදා චෞන්ග් යූ නගරයට 100ක් පමණ රැස්ව සිටියදී මෙම සිදුවීම සිදු වූ බව ජුන්ටා විරෝධී මහජන ආරක්ෂක බලකාය යටතේ සිටින ප්‍රාදේශීය නිලධාරියෙකු පවසා තිබේ.

බෞද්ධ උත්සවයක් වූ මෙම උත්සවය, ඉටිපන්දම් දල්වා මියන්මාර ජුන්ටා ප්‍රතිපත්තිවලට එරෙහිව විරෝධතා දැක්වීමේ ස්ථානයක් ලෙස වාර්තා විය.

2021 දී මියන්මාරයේ හමුදාව රජයට එරෙහිව කුමන්ත්‍රණයක් දියත් කළ දා සිට එරට සිවිල් යුද්ධයක පවතී.

එක්සත් ජාතීන්ගේ ඇස්තමේන්තුවලට අනුව සිවිල් යුද්ධයෙන් සිවිල් වැසියන් 5,000කට වැඩි පිරිසක් මියගොස් ඇත.

තාඩින්යුට් උත්සවයේ රැස්ව සිටි පිරිසට ගුවන් ප්‍රහාරයක් එල්ල විය හැකි බවට තොරතුරු ලැබුණු බවත්, ඔවුන්ගේ කණ්ඩායම එම ස්ථානයට ළඟා වී ජුන්ටාවේ ප්‍රතිපත්තිවලට එරෙහිව එම ස්ථානයේ පැවති විරෝධතාවය අවසන් කිරීමට උත්සාහ කළ නමුත්, බලාපොරොත්තු වූවාට වඩා කළින් උත්සව ස්ථානයට බෝම්බ ළඟා වූ බවත් මහජන ආරක්ෂක බලකායේ නිලධාරියෙක් බීබීසීයට පවසා තිබේ.

“ඔවුන් විනාඩි හතක් ඇතුළත බෝම්බය හෙළුවා. පළමු බෝම්බය වැටුණු විට, මම බිම වැටුණා, නමුත් එය මගේ දණහිසේ පහළ කොටසට වැදුණා. මා අසල මිනිසුන් මියගියා,” නිලධාරියා පවසා ඇත.

අන්තර්ජාතික ක්ෂමා සංවිධානය අඟහරුවාදා ප්‍රකාශයක් නිකුත් කරමින්, ප්‍රජාවන්ට පහරදීම සඳහා ජුන්ටාව විසින් මෝටාර් බෝම්බ භාවිත කිරීම විවේචනය කළ අතර එය කලාපයේ කලබලකාරී ප්‍රවණතාවයක කොටසක් බව පැවසීය.

ගුවන් යානා සහ හෙලිකොප්ටර් නොමැතිකම හේතුවෙන් ජුන්ටාව පැරග්ලයිඩර් වැඩි වශයෙන් තෝරාගෙන ඇති බව මීට පෙර වාර්තාවකින් අනාවරණ කර තිබිණි.