ඉන්ධන ප්‍රවාහන නෞකාවක සේවය කළ 22 හැවිරිදි ඉන්දීය වෙළඳ නාවික කැඩෙට් නිලධාරියකු ශ්‍රී ලංකාවේ වෙරළට ඔබ්බෙන් යාත්‍රා කරමින් සිටියදී අතුරුදහන් වී ඇති බව ඔහුගේ පවුලේ අය ප්‍රකාශ කර තිබේ.

කරන්දීප් සිං රානා නම් වෙළඳ නාවික කැඩෙට් නිලධාරියා සැප්තැම්බර් 20 වැනිදා ඉරාකයේ සිට චීනය දක්වා යාත්‍රා කරමින් සිටියදී අතුරුදහන් වී තිබේ.

ඔහුගේ පියා වන නරේන්ද්‍ර සිං රානාට අනුව, අදාළ යාත්‍රාවට ශ්‍රී ලංකාව අසල කලින් සැලසුම් කළ නැවතුමක් ද තිබී ඇත.

කරන්දීප් අගෝස්තු 18 වැනිදා ඩෙරාඩූන් නුවරින් පිටත් වී සිංගප්පූරුවට ගොස් ඇති අතර එහිදී ඔහු ඉරාකය බලා යන ඉන්ධන ප්‍රවාහන නෞකාවට ගොඩ වී තිබේ.

එතැන් සිට නෞකාව ශ්‍රී ලංකාව හරහා චීනය දෙසට යාත්‍රා කළේය.

ඩෙරාඩූන් හි පටෙල් නගර් ප්‍රදේශයේ පදිංචිකරුවකු වන නරේන්ද්‍ර පැහැදිලි කළේ, සැප්තැම්බර් 20 වැනිදා රාත්‍රී 9.30ට පමණ විධායක නැව් කළමනාකරණ කාර්යාලයෙන් කරන්දීප් අතුරුදහන් වී ඇති බව පවුලට දැනුම්දුන් බවයි.

“මෙය ඇසීමෙන් අපි කම්පනයට පත් වූයේ එදින දහවල් අපි ඔහුට කතා කළ නිසා. ඔහු සම්පූර්ණයෙන්ම හොඳින් සිටියා,” ඔහු PTI පුවත් සේවය වෙත වෙත පැවසීය.

වැඩිදුර විමසීම්වලින් පසු, සමාගමේ නිලධාරීන් පවුලේ අයට පවසා ඇත්තේ කරන්දීප් තනිවම නෞකාවේ තට්ටුවට ගොස් ඇති බවත් එතැන් සිට ඔහු සොයා ගැනීමට නොහැකි වූ බවත්ය.

පුවත ලැබුණු දා සිට, පවුලේ අය ප්‍රධාන අමාත්‍යවරයාට, ප්‍රාන්ත රජයේ නිලධාරීන් සහ විදේශ කටයුතු අමාත්‍යාංශය ඇතුළු විවිධ මාර්ග හරහා උපකාර ඉල්ලා සිටින බව නරේන්ද්‍ර පැවසීය.

සෙවීමේදී සහාය ලබා ගැනීම සඳහා ඔහු සෙනසුරාදා ප්‍රධාන අමාත්‍ය පුෂ්කර් සිං ධාමි ද හමුවිය.

කරන්දීප් දිගු කලක් වෙළඳ නාවික හමුදාවට බැඳීමට අපේක්ෂාවෙන් සිට ඇති තරුණයකු වන අතර තෙවැනි නිලධාරියා ලෙස උසස් වීමට ද නියමිතව සිටියේය.