නව විතානකන්ද තේ කර්මාන්ත ශාලාව විසින් ඉදිරිපත් කරන ලද ලොව වටිනාම සහ මිල අධිකම තේ ලෙස ගිනස් ලෝක වාර්තා මගින් පිළිගත් FFඅති විශේෂ කළු තේ, අන්තර්ජාතික වෙන්දේසියකදී පසුගියදා සාර්ථකව අලෙවි විය.

වෙන්දේසියට සහභාගී වූ ප්‍රධාන විධායක නිලධාරී පුබුදු ගුණසේකර අද උදෑසන බණ්ඩාරනායක අන්තර්ජාතික ගුවන්තොටුපළින් දිවයිනට පැමිණියේය.

වෙන්දේසිය සෑම වසර තුනකට වරක් ශ්‍රී ලංකා තේ මණ්ඩලය විසින් සංවිධානය කරන ලද ‘ලංකා විශේෂ තේ’ තරඟයේ කොටසක් විය.

ශ්‍රී ලංකාව කෘෂි දේශගුණික දිස්ත්‍රික්ක හතකට බෙදා ඇති අතර, සෑම කලාපයකින්ම එක් ජයග්‍රාහී තේ නිෂ්පාදකයකු තෝරා ගනු ලැබේ.

මෙම ජයග්‍රාහකයන් 2026/09 දින ජපානයේ ඔසාකා හි පැවති තේ වෙන්දේසියට යවන ලදී.

මෙම උත්සවය ශ්‍රී ලංකා තේ මණ්ඩලය සහ ජපන් තේ වෙළඳුන්ගේ සංගමය එක්ව ජපානයේ එක්ස්පෝ 2025 අන්තර්ජාතික ප්‍රදර්ශනය සමඟ ඒකාබද්ධව සංවිධානය කරන ලද අතර අන්තර්ජාතික ගැනුම්කරුවන් 70 දෙනෙකු සහභාගී වී තිබිණි.

නව විතානකන්ද තේ කර්මාන්ත ශාලාව විසින් ඉදිරිපත් කරන ලද සබරගමුව කලාපයෙන් ලබාගත් කළු තේ, ජනට් පැරිස් අන්තර්ජාතික සමාගම විසින් කිලෝග්‍රෑමයකට ජපන් යෙන් 125,000කට (ශ්‍රී ලංකා රුපියල් 255,000ක් පමණ) මිලදී ගන්නා ලදී.

එය ලොව පුරා තේ සඳහා වාර්තා වූ ඉහළම මිලයි.

වෙන්දේසියෙන් ලැබෙන සියලුම මුදල් ශ්‍රී ලංකාවේ තේ වතු කම්කරුවන්ගේ දරුවන්ගේ අධ්‍යාපනය සඳහා යොමු කෙරේ.

කටුනායක ගුවන්තොටුපළේදී කණ්ඩායම පිළිගැනීමට නව විතානකන්ද තේ කර්මාන්ත ශාලා මණ්ඩලය සහ තේ තැරැව්කරුවන්ගේ සංගමයේ ජ්‍යෙෂ්ඨ නිලධාරීන් පිරිසක් සහභාගී වූහ.