ඩුබායි සිට පිටුවහල් කරන ලද ශ්‍රීධරන් නිරන්ජන් හෙවත් ‘ටින්කර්’ අද (1) උදෑසන දිවයිනට ගෙනැවිත් මෙරට බලධාරීන්ට භාරදී තිබේ.

අපරාධ පරීක්ෂණ දෙපාර්තමේන්තුවේ (CID) නිලධාරීන් ඔහුව කටුනායක බණ්ඩාරනායක අන්තර්ජාතික ගුවන්තොටුපළේදී අත්අඩංගුවට ගෙන පෑලියගොඩ පොලිසියට භාර දී ඇත.

කොළඹ 15 පදිංචි 36 හැවිරිදි මෙම සැකකරු, කුප්‍රකට සංවිධානාත්මක අපරාධ සහ මත්ද්‍රව්‍ය ජාවාරම්කරුවකු වන පලනි ශිරාන් ග්ලෝරියන් හෙවත් ‘කොච්චිකඩේ ශිරාන්’ ගේ සහචරයකු බව පොලිසිය පවසයි.

විමර්ශනවලට අනුව, ‘ටින්කර්’ 2024 ඔක්තෝබර් 16 වැනිදා ග්‍රෑන්ඩ්පාස් පොලිස් කොට්ඨාසයේ මහවත්ත පොදු සුසාන භූමිය අසලදී පුද්ගලයකුට වෙඩි තැබීමේ සිද්ධියට සම්බන්ධ වාහනයේ රියදුරු ලෙස කටයුතු කර ඇති බව කියනු ලැබේ.

2025 අගෝස්තු 19 වැනිදා පෑලියගොඩ දී තවත් ප්‍රහාරයකට භාවිත කළ ගිනි අවි ප්‍රවාහනය කිරීම සම්බන්ධයෙන් ද ඔහුට චෝදනා එල්ල වී ඇති අතර එහිදී එක් අයකු මිය ගොස් තවත් අයෙකු බරපතළ තුවාල ලැබීය.

ඔහුට එරෙහිව විදේශ ගමන් තහනමක් දැනටමත් පනවා ඇති බව පොලිසිය පැවසූ නමුත් පසුව කරන ලද පරීක්ෂණවලින් හෙළි වූයේ ඔහු අගෝස්තු මාසයේදී රටින් පිටව යෑමට සමත් වූ බවයි.

ඔහු අද පස්වරුවේ කොළඹ ප්‍රධාන මහේස්ත්‍රාත් අධිකරණයේ අංක 5 වෙත ඉදිරිපත් කිරීමට නියමිතය.

පෑලියගොඩ පොලිසිය විසින් වැඩිදුර පරීක්ෂණ සිදු කරනු ලැබේ