පාර්ලිමේන්තුවේ මුළුතැන්ගෙයි සෞඛ්‍ය ආරක්ෂාව පිළිබඳ ගැටලුවක් පවතින බව ප්‍රකාශ කර ඇති හෙයින් එය තාවකාලිකව වසා දමා එම වැරදි වහාම නිවැරදි කරන්නැයි විපක්ෂයේ මන්ත්‍රීවරුන් කථානායක වෛද්‍ය ජගත් වික්‍රමරත්නගෙන් ඉල්ලීමක් කර ඇත.

මේ සම්බන්ධයෙන් පාර්ලිමේන්තු කටයුතු පිළිබඳ කාරක සභාවේදී කරුණු දක්වා ඇති නව ප්‍රජාතන්ත්‍රවාදී පෙරමුණේ පාර්ලිමේන්තු මන්ත්‍රී රවී කරුණානායක පවසා ඇත්තේ පාර්ලිමේන්තුවෙන් සැපයෙන ආහාර සඳහා මන්ත්‍රීවරුන් සහ සේවකයන් සැලකිය යුතු මුදලක් ගෙවන හෙයින් පිරිසිදු කෑම වේලක් සැපයීමේ වගකීමක් පාලනාධිකාරියට තිබෙන බවය.

මෙහිදී අදහස් දක්වා ඇති කථානායකවරයා පාර්ලිමේන්තු මුළුතැන් ගෙයි වැරදි සියල්ල නිවැරදි කිරීමට ඉදිරියේදී කටයුතු කරන බව පවසා ඇත. අඩුපාඩු සොයා බැලීම සඳහා කථානායකවරයා විසින් විශේෂ කමිටුවක් පසුගියදා පත් කෙරුණු අතර එම කමිටුවෙන් ඉදිරිපත් කෙරෙන වාර්තාව අනුව අඩුපාඩු නිවැරදි කිරීමට කටයුතු කෙරෙනු ඇත.

කථානායකවරයා පසුගියදා පොළොන්නරුවේදී රැස්වීමක් අමතමින් පාර්ලිමේන්තුවේ මුළුතැන්ගෙය නරකාදියක් බව ප්‍රකාශ කළේය. එහි අපිරිසිදු බව හේතුවෙන් ඉන් සලාද කෑම පවා නතර කළ බව පැවසූ කථානායකවරයා සමහර කෑම පිළියෙළ කරන්නේ ශරීරයට අහිතකර රසකාරක පාවිච්චි කරමින් යැයිද සඳහන් කළේය.(ඉරිදා ලංකාදීප)