නියමිත වේලාවට වීසා ලබා ගැනීමට අපොහොසත් වීම හේතුවෙන් ජිබ්‍රෝල්ටාර් හි පැවැත්වෙන 2025 ලෝක යොවුන් කුසලාන දැල්පන්දු තරගාවලියෙන් ශ්‍රී ලංකාව ඉවත් වී ඇති අතර, එම නිසා කණ්ඩායමට එහි සියලුම කණ්ඩායම් අදියර තරඟ අහිමි වී ඇත.

ලෝක දැල්පන්දු සංගමය නිවේදනය කළේ, ශ්‍රී ලංකාව සහ සැම්බියාව යන කණ්ඩායම් දෙකම ඔවුන්ගේ සහභාගීත්වය වටා පවතින ගැටලු හේතුවෙන් තරඟාවලියෙන් ඉවත්කර ඇති බවයි.

එහි ප්‍රතිඵලයක් ලෙස, ඔවුන්ගේ නියමිත තරඟ ‘පරාජයන්’ ලෙස සටහන් වී ඇති අතර, තරඟ නීතිරීතිවලට අනුකූලව ප්‍රතිවාදීන්ට ලකුණු දෙකක් ප්‍රදානය කර ඇත.

එම තරඟාවලියේදී ශ්‍රී ලංකාව එංගලන්තය, ජැමෙයිකාව සහ ටොංගා සමඟ C කාණ්ඩයෙන් ක්‍රීඩාකිරීමට නියමිතව තිබිණි.

ඒ අනුව එංගලන්තය, ජැමෙයිකාව සහ ටොංගා යන කණ්ඩායම් සඳහා ජයග්‍රහණ හිමිවන බව සංවිධායකයින් තහවුරු කර ඇත.

A කාණ්ඩයේ සැම්බියාවේ ප්‍රතිවාදීන්ව සිටින කණ්ඩායම් සඳහා ද අහිමි වූ තරඟ වෙනුවෙන් ලකුණු ලබා දී තිබේ.

වීසා ප්‍රමාදයන් හේතුවෙන් ශ්‍රී ලංකා කණ්ඩායමට ආරම්භක තරඟ සඳහා නියමිත වේලාවට ජිබ්‍රෝල්ටාර් වෙත යාමට නොහැකි වූ බව ජනමාධ්‍ය වාර්තා කර තිබිණි.

ජිබ්‍රෝල්ටාර් යනු බ්‍රිතාන්‍යට අයත් භූමියක් බැවින් ක්‍රීඩකයින් බ්‍රිතාන්‍ය මහ කොමසාරිස් කාර්යාලය හරහා වීසා ලබා ගැනීම අවශ්‍ය වේ.

මේ සම්බන්ධයෙන් අදහස් දක්වමින් ලෝක දැල්පන්දු සංගමය පවසා ඇත්තේ මෙම සිදුවීම් හේතුවෙන් කණ්ඩායම් දෙකේ සහ රසිකයින්ගේ බලාපොරොත්තු සුන්වීම පිළිබඳ කණගාටු වන බවයි.

ලොව පුරා වයස අවුරුදු 21 න් පහළ කණ්ඩායම් සහභාගී වන ලෝක යොවුන් කුසලාන දැල්පන්දු තරගාවලියෙන් සැප්තැම්බර් 19-28 දක්වා ජිබ්‍රෝල්ටාර් හිදී පැවැත්වේ.