ඇතැම් අමාත්‍යවරුන් සතුව ක්‍රිප්ටෝ මුදල් ඇති බව අනාවරණ වී ඇති පසුබිමක එවැනි මුදල් වර්ග සම්බන්ධයෙන් විනිවිදභාවය සහතික කිරීමේ අවශ්‍යතාව සමගි ජන බලවේගය (SJB)අවධාරණය කළේය.

සමගි ජන බලවේගයේ ගම්පහ ආසන සංවිධායක වරුණ දීප්ත රාජපක්ෂ මෙම ගැටළු මතු කළේ, විශේෂයෙන් ආණ්ඩු පක්ෂයේ ප්‍රධාන දේශපාලනඥයන් ගණනාවකගේ වත්කම් සහ වගකීම් පිළිබඳ විස්තර මේ සතියේ සමාජ මාධ්‍ය වේදිකාවල ප්‍රසිද්ධ වීමත් සමගය.

“ඇතැම් අමාත්‍යවරුන් ක්‍රිප්ටෝ මුදල් ඔවුන්ගේ ආයෝජන ලෙස භාවිත කර තිබෙනවා. කෙසේවෙතත්, ක්‍රිප්ටෝ මුදල් ශ්‍රී ලංකාවේ නීත්‍යනුකූලව පිළිගෙන නැහැ. ක්‍රිප්ටෝ මුදල් තබා ගැනීමට නීතිමය බාධාවක් නැහැ. නමුත්, එය මුදල් හුවමාරු කිරීම් සඳහා හෝ ගනුදෙනු සඳහා භාවිත කළ නොහැකියි,” ඔහු ඊයේ (18) පැවති මාධ්‍ය හමුවකදී පැවසීය.

යමෙකුට ක්‍රිප්ටෝ මුදල් වත්කමක් ලෙස තිබේ නම්, එය ලබා ගත් ආකාරය සහ අවශ්‍ය අරමුදල් උපයා ගත් ආකාරය ඇතුළු තොරතුරු ඉදිරිපත් කළ යුතු බව ද ඔහු පැවසීය.

එසේ කිරීමට අපොහොසත් වුවහොත්, එවැනි කරුණු විමර්ශනය කිරීමට අල්ලස් හෝ දූෂණ චෝදනා විමර්ශන කොමිසමට බලය ඇති බව ඔහු සඳහන් කළේය.

නීතියට අනුකූලව ක්‍රිප්ටෝ මුදල් ළඟ තබා ගන්නේද යන්න සොයා බැලීම අල්ලස් කොමිසමේ යුතුකම බව ඔහු පැවසීය