බ්‍රිතාන්‍ය බොක්සිං පුරාවෘත්තයක් වන 46 හැවිරිදි රිකී හැටන් මිය ගොස් තිබේ.

ඔහුගේ මරණය සිදුව ඇත්තේ නැවත බොක්සිං වළල්ලට පැමිණෙන බව නිවේදනය කිරීමෙන් සති කිහිපයකට පසුවය.

හිටපු ලෝක ශූරයා ග්‍රේටර් මැන්චෙස්ටර් හි ඔහුගේ නිවසේදී මියගොස් සිටියදී සොයා ගෙන ඇත.

ඔහුගේ මරණය සැක සහිත ලෙස නොසළකන බව පොලිසිය පැවසීය.

1997 සහ 2012 අතර ඔහුගේ වෘත්තීය ජීවිතය තුළ, හැටන් සැහැල්ලු වෙල්ටර්වේට් සහ වෙල්ටර්වේට් අංශවල ශූරතා කිහිපයක් දිනා ගත්තේය.

ඔහු සෑම කාලයකම වඩාත්ම ආදරණීය බ්‍රිතාන්‍ය බොක්සිං ක්‍රීඩකයකු ලෙස ප්‍රශංසා ලබා ඇත.

“අද පෙ.ව. 6:45ට ටේම්සයිඩ් හයිඩ් හි බෝලර්ක් පාරට පැමිණෙන ලෙස කෙනෙකු විසින් නිලධාරීන්ට කතා කර තිබුණා. එහිදී ඔවුන්ට 46 හැවිරිදි මිනිසකුගේ මළ සිරුර හමු වී තිබුණා. දැනට කිසිදු සැක සහිත තත්වයක් ඇතැයි විශ්වාස කරන්නේ නැහැ.” යනුවෙන් මහා මැන්චෙස්ටර් පොලිස් ප්‍රකාශකයෙක් පැවසීය.

මේ වසරේ ජූලි මාසයේදී, හැටන් පැවසුවේ දෙසැම්බර් මාසයේ ඩුබායි හි පැවත්වෙන් තරඟයක් සඳහා ආපසු පැමිණෙන බවයි.

ඒ ඔහුගේ අවසන් වෘත්තීය තරඟයෙන් වසර 13කට පසුවය.

ඔහු මීට පෙර මානසික සෞඛ්‍යය හා මත්ද්‍රව්‍යවලට ඇබ්බැහි වීම පිළිබඳ ඔහුගේ අරගල ගැන ප්‍රසිද්ධියේ කතා කර ඇති අතර, අතීතයේ දී සියදිවි නසාගැනීමේ උත්සාහයන්ගෙන් බේරී සිට තිබිණි.

ඔහුගේ අභාවය සැලවීමත් සමග වෙනත් ක්‍රීඩකයන් ද ඔහුට උපහාර දක්වා ඇත.

හිටපු බොක්සිං ක්‍රීඩක අමීර් ඛාන් පැවසුවේ හැටන් “බ්‍රිතාන්‍යයේ ශ්‍රේෂ්ඨතම බොක්සිං ක්‍රීඩකයකු පමණක් නොව, මිතුරකු, උපදේශකයකු සහ රණශූරයකු” බවයි.

ආදරණීය මිතුරකු මිය ගිය පුවත ඇසීම මහත් දුකක් බව වෘත්තීය ඩාර්ට්ස් ක්‍රීඩක ජේම්ස් වේඩ් පැවසීය.

ගුවන් විදුලි විකාශක පියර්ස් මෝගන් ඔහුගේ මරණය විස්තර කළේ “ඇදහිය නොහැකි තරම් කනගාටුදායක පුවතක්” ලෙසයි.