රුපියල් මිලියන 85 ක් වටිනා කුෂ් කිලෝග්‍රෑම් 8.542 ක් බණ්ඩාරනායක අන්තර්ජාතික ගුවන්තොටුපොළ හරහා නීතිවිරෝධී ලෙස රැගෙන ඒමට උත්සාහ කරමින් සිටියදී ඉන්දීය ජාතිකයෙකු අත්අඩංගුවට ගෙන තිබේ.

සැකකරු ඊයේ (13) උදෑසන 9.45 ට පමණ ශ්‍රී ලංකන් ගුවන් සේවයේ ගුවන් යානයකින් ශ්‍රී ලංකාවට පැමිණ ඇති අතර ඉන්දියාවේ මදුරෙයි බලා ආපසු ගුවන් යානයට ගොඩවීමට ගුවන්තොටුපළේ රැඳීසිට තිබේ.

ශ්‍රී ලංකන් ගුවන් සේවයේ නිලධාරීන් විසින් සිදුකරන ලද සාමාන්‍ය ගමන් මලු පරීක්ෂාවකදී සැක සහිත සලකුණු අනාවරණය වී ඇති අතර, ‘රැන්ඩි’ නම් පොලිස් සුනඛයකු මත්ද්‍රව්‍ය තොගය සොයාගෙන ඇත.

පරීක්ෂා කිරීමේදී, මගියාගේ ගමන් මලුවල සඟවා තිබූ කිලෝග්‍රෑම් 8 යි ග්‍රෑම් 542 ක් බරැති කුෂ් පැකට් 16 ක් නිලධාරීන් විසින් සොයාගෙන තිබේ.

ඔහු හෙට (14) මීගමුව මහේස්ත්‍රාත් අධිකරණයට ඉදිරිපත් කිරීමට නියමිතව තිබිණි.

අත්අඩංගුවට ගත් මත්ද්‍රව්‍ය සහ සැකකරු වැඩිදුර පරීක්ෂණ සඳහා කොළඹ පොලිස් මත්ද්‍රව්‍ය නාශක කාර්යාංශ මූලස්ථානයට භාරදී ඇත