නීතිය තම අයිතිවාසිකම් සහ අවශ්‍යතා ආරක්ෂා කිරීමට ක්‍රියාශීලී වන පුද්ගලයන්ට සහාය දෙන බවත්, නොසැළකිලිමත් හෝ සාධාරණ කාල රාමු තුළ ක්‍රියා කිරීමට අපොහොසත් වන අයට සහාය නොදක්වන බවත් ශ්‍රේෂ්ඨාධිකරණය ප්‍රකාශ කළේය.

ශ්‍රේෂ්ඨාධිකරණය මේ බව ප්‍රකාශ කළේ විධායක හෝ පරිපාලන ක්‍රියාමාර්ග මගින් මූලික අයිතිවාසිකම් උල්ලංඝනය කිරීම් සඳහා අධිකරණ බලය ඉල්ලා සිටින අයට ආණ්ඩුක්‍රම ව්‍යවස්ථාවේ නියම කර ඇති කාල සීමාව සම්බන්ධයෙන් වන සිය තීන්දුවේදීය.

මෙම මූලික අයිතිවාසිකම් පෙත්සමට “නීතිය සහාය වන්නේ අවදියෙන් සිටින අයට මිස ඔවුන්ගේ අයිතිවාසිකම් මත නිදා සිටින අයට නොවේ” යන අර්ථය ඇති “vigilantibus non dormientibus jura subveniunt” යන නීතිමය උපමාව අදාළ කරමින්, ආණ්ඩුක්‍රම ව්‍යවස්ථාවේ 126(2) වගන්තිය යටතේ පෙත්සම්කරු මූලික අයිතිවාසිකම් උල්ලංඝනය කිරීමේ චෝදනාවෙන් මාසයක් ඇතුළත අයදුම්පතක් ඉදිරිපත් කළ යුතු බවට නියෝග කරන කාල සීමාවේ අවශ්‍යතාව සපුරාලීමට අපොහොසත් වීම උපුටා දක්වමින් ශ්‍රේෂ්ඨාධිකරණය අයදුම්පත ප්‍රතික්ෂේප කිරීමට තීරණය කළේය.

විනිසුරු ශිරාන් ගුණරත්න තීන්දුව ලබා දුන් අතර, විනිසුරු ඒ.එච්.එම්.ඩී. නවාස් සහ විනිසුරු අචල වෙන්ගප්පුලි එම තීන්දුවට එකඟ වූහ.

“චෝදනා කරන ලද උල්ලංඝනය පිළිබඳ දැන සිටි පෙත්සම්කරු, නියමිත කාලය තුළ මෙම අධිකරණයේ අධිකරණ බලය ඉල්ලා නොසිටීමට තීරණය කළේය. පෙත්සම්කරුට පාලනයෙන් ඔබ්බට ගිය තත්ත්වයන් හේතුවෙන් එසේ කිරීමෙන් වළක්වා ඇති බවට යෝජනා කිරීමට කිසිදු කරුණක් මෙම අධිකරණය ඉදිරියේ ඉදිරිපත් කර නොමැති අතර, ප්‍රමාදය පැහැදිලි කළ නොහැක,” යනුවෙන් විනිසුරු ගුණරත්න නිරීක්ෂණය කළේය.

ශ්‍රී ලංකා ගුවන් හමුදාවේ හිටපු නිලධාරියකු වන කුලසූරිය නම් පෙත්සම්කරු, උසස් නිලධාරීන් විසින් ශාරීරික පහරදීම්, නීති විරෝධී ලෙස රඳවා තබා ගැනීම, ක්‍රියාපටිපාටික අසාධාරණය සහ හිරිහැර කිරීම හේතුවෙන් පැන නගින තම මූලික අයිතිවාසිකම් උල්ලංඝනය කිරීම් සම්බන්ධයෙන් ආණ්ඩුක්‍රම ව්‍යවස්ථාවේ 126 වැනි වගන්තිය යටතේ ශ්‍රේෂ්ඨාධිකරණයේ අධිකරණ බලය ඉල්ලා සිටියේය.

ශ්‍රී ලංකා ගුවන් හමුදාවේ ප්‍රසම්පාදන අංශයට අනුයුක්ත වින්ග් කමාන්ඩර්වරයකු විසින් තම මූලික අයිතිවාසිකම් උල්ලංඝනය කළ බවට චෝදනා එල්ල වී ඇත්තේ 2015 සැප්තැම්බර් 10 වැනි දින හෝ ඊට ආසන්න දිනකදී බව ඔහු කියා සිටියේය.

කෙසේවෙතත්, මූලික අයිතිවාසිකම් අයදුම්පත ශ්‍රේෂ්ඨාධිකරණය හමුවේ ගොනු කරන ලද්දේ 2015 ඔක්තෝබර් 30 වැනි දිනය.

එය ආණ්ඩුක්‍රම ව්‍යවස්ථාවේ 126(2) වගන්තිය යටතේ නියම කර ඇති මාසයක කාල සීමාව ඉක්මවා ගොස් තිබේ.

ශ්‍රී ලංකා මානව හිමිකම් කොමිෂන් සභාව (HRCSL) ඉදිරියේ කිසිදු පරීක්ෂණයක් විභාග වෙමින් පවතින බවට කිසිදු සාක්ෂියක් තමන් ඉදිරියේ නොමැති බව ශ්‍රේෂ්ඨාධිකරණය තවදුරටත් නිරීක්ෂණය කළේය.

පෙත්සම්කරු වෙනුවෙන් නීතිඥ නුවන් බෝපගේ පෙනී සිටියේය.

මංජුල බාලසූරියගේ උපදෙස් මත නීතිඥ වරුණ ද සේරම් සමඟ ජනාධිපති නීතිඥ සාලිය පීරිස් තුන්වැනි වගඋත්තරකරු වෙනුවෙන් පෙනී සිටියේය.

නීතිපතිවරයා වෙනුවෙන් රජයේ නීතිඥ සජිත් බණ්ඩාර පෙනී සිටියේය.