ටැන්සානියාවේ මැතිවරණ විරෝධතා අතරතුර දින තුනකදී පුද්ගලයන් 700ක් පමණ මිය ගොස් ඇති බව ප්‍රධාන විරුද්ධ පක්ෂය පවසා තිබේ.

ජනාධිපතිවරණ ඡන්ද පත්‍රිකාවෙන් ප්‍රධාන අපේක්ෂකයන් බැහැර කිරීමෙන් පසු එයට එරෙහිව බදාදා මැතිවරණ දිනයේදී විරෝධතා ආරම්භ විය.

චැඩෙමා විරුද්ධ පක්ෂයේ ප්‍රකාශකයකු වන ජෝන් කිටෝකා AFP වෙත පවසා ඇත්තේ බදාදා සිට පුද්ගලයන් සිය ගණනක් මරා දමා ඇති බවයි.

“ඩාර් හි මරණ සංඛ්‍යාව 350ක් පමණ වනවා. මුවන්සාවල මරණ 200කට වැඩියි. රට පුරා අනෙකුත් ස්ථානවල සංඛ්‍යාලේඛන එකතු කළ විට, සමස්ත සංඛ්‍යාව 700ක් පමණ වෙනවා,” ඔහු පැවසීය.

බදාදා සිට පනවන ලද රාත්‍රී කාලයේ ඇඳිරි නීතිය අතරතුර ඝාතන සිදුවිය හැකි බැවින් මෙම සංඛ්‍යාව බෙහෙවින් වැඩි විය හැකි බව ඔහු පැවසීය.

ආරක්ෂක මූලාශ්‍රයක් AFP වෙත පැවසුවේ 500කට වැඩි පිරිසක් මිය ගොස් ඇති බවට වාර්තා ලැබී ඇති බවත්, ඇතැම් විට මුළු රටේම එම සංඛ්‍යාව 700-800ක් විය හැකි බවත්ය.

අවම වශයෙන් පුද්ගලයන් 100 දෙනෙකු ඝාතනය කර ඇති බවට තොරතුරු ලැබී ඇති බව ඇම්නෙස්ටි ඉන්ටර්නැෂනල් ද පැවසීය.

රෝහල් සහ සෞඛ්‍ය සායන වෙත යන පක්ෂ සාමාජිකයන්ගේ ජාලයක් මගින් සහ මළ සිරුරු ගණන් කිරීම මගින් චැඩෙමා හි සංඛ්‍යා රැස් කර ඇති බව කිටෝකා පැවසීය.

ඔහු රජයෙන් ඉල්ලා සිටියේ විරෝධතාකරුවන් ඝාතනය කිරීම නවත්වන ලෙසයි.

නිදහස් හා සාධාරණ මැතිවරණ සඳහා මග පෑදීමට සංක්‍රාන්ති රජයක් පිහිටුවන ලෙස ද ඔහු ඉල්ලා සිටියේය.

වේගයෙන් තීව්‍ර වන මර්දනය සහ ප්‍රධාන විරුද්ධවාදීන් ජනාධිපති තරඟයෙන් බැහැර කිරීම මධ්‍යයේ ජනාධිපති සමියා සුලුහු හසන් මැතිවරණයට මුහුණ දුන්නාය.

අප්‍රේල් මාසයේදී චැඩෙමා හි උප සභාපති ටුන්ඩු ලිසු අත්අඩංගුවට ගෙන රාජද්‍රෝහීත්වය සහ සයිබර් අපරාධ වැරදි සම්බන්ධයෙන් චෝදනා කර තිබිණි..

මැතිවරණ ක්‍රම ප්‍රතිසංස්කරණය නොකළහොත් මැතිවරණය වර්ජනය කිරීම සඳහා ඉල්ලීම් මෙහෙයවූ ඔහුගේ පක්ෂය පසුව ඊට සහභාගී වීමට නුසුදුස්සකු විය.

පසුගිය මාසයේ, තවත් විරුද්ධ පක්ෂයක් වන ACT-Wazalendo හි නායක ලුහාගා ම්පිනා ද නුසුදුස්සකු කරන ලදී.

ඒ අනුව හසන් තරඟ කරනු ලැබුවේ සුළු පක්ෂවලින් එතරම් ප්‍රසිද්ධ නැති විරුද්ධවාදීන් සමගය.

මැතිවරණයට පෙර රජය විවේචනය කළ අය ද පැහැරගෙන ගොස් අත්අඩංගුවට ගන්නා ලදී.

බදාදා සිට, විරෝධතාකරුවන් විශාල පිරිසක් පොලිසියට පහර දී පාලක පක්ෂයට සම්බන්ධ ව්‍යාපාරවලට අයත් දේපළ විනාශ කර ඇත.

පෙළපාලි ප්‍රධාන වශයෙන් ඩාර් එස් සලාම් වරාය නගරය කේන්ද්‍ර කර ගත් නමුත් එතැන් සිට රට පුරා ව්‍යාප්ත විය.

රජය ඇඳිරි නීතිය පැනවීමට කටයුතු කළේය.

අන්තර්ජාල බාධාවක් ද වාර්තා විය.

බ්‍රහස්පතින්දා, හමුදා ප්‍රධානී ජෙනරාල් ජේකබ් ජෝන් ම්කුන්ඩා ප්‍රචණ්ඩත්වය හෙළා දුටු අතර විරෝධතාකරුවන් ‘අපරාධකරුවන්’ ලෙස හැඳින්වීය.

ආරක්ෂක හමුදා තත්ත්වය පාලනය කිරීමට උත්සාහ කරන බව ඔහු පැවසීය.

විරෝධතාවල මරණ හා තුවාල පිළිබඳ එක්සත් ජාතීන්ගේ මානව හිමිකම් පිළිබඳ මහ කොමසාරිස් (OHCHR) පැවසුවේ, ආරක්ෂක හමුදා විසින් අවම වශයෙන් පුද්ගලයන් 10 දෙනෙකු ඝාතනය කර ඇති බවට වාර්තා ලැබී ඇති බවයි.

ඩාර් එස් සලාම්, වයඹ දෙසින් ෂින්යාන්ගා සහ නැගෙනහිරින් මොරොගොරෝ යන ප්‍රදේශවල මරණ පිළිබඳ විශ්වාසදායක වාර්තා ලැබී ඇති බවත්, විරෝධතාකරුවන් විසුරුවා හැරීම සඳහා ආරක්ෂක හමුදා ජීව උණ්ඩ සහ කඳුළු ගෑස් ප්‍රහාර එල්ල කළ බවත් මානව හිමිකම් පිළිබඳ මහ කොමසාරිස් කාර්යාලයේ ප්‍රකාශක සෙයිෆ් මගන්ගෝ පැවසුවේය.

අනවශ්‍ය හෝ අසමානුපාතික බලය භාවිත කිරීමෙන් වළකින ලෙසත්, විරෝධතාකරුවන් සාමකාමීව විරෝධතා දැක්වීමට ඉඩ දෙන ලෙසත් එම කාර්යාලය ආරක්ෂක අංශවලින් ඉල්ලා සිටියි.