මෙරට සිරගෙවල්වල සිරකර සිටි පකිස්ථාන ජාතිකයන් 56 දෙනෙකු සඳුදා ආපසු ගෙන්වා ගැනීමට පාකිස්ථාන අභ්‍යන්තර කටයුතු අමාත්‍යාංශය කටයුතු කර තිබේ.

සිරකරුවන් පකිස්ථානයට රැගෙන ඒම සඳහා වාණිජ ගුවන් යානයක් පිටත් කර එවා ඇත.

නැවත ගෙන්වා ගන්නා පකිස්ථාන ජාතිකයන් අතර කාන්තාවන් පස් දෙනෙකු සහ පිරිමින් 51 දෙනෙකු සිටින බව වාර්තා වේ.

මෙම ගෙන්වාගැනීම සිදුවන්නේ දෙරට අතර මාස තුනක සම්බන්ධීකරණයකින් පසුවය.

එහිදී අදහස් දැක්වූ එක් කාන්තාවක් තමන් යළි ගෙන්වා ගැනීම සම්බන්ධයෙන් පාකිස්ථාන රජයට ස්තුතිය පළ කළාය.

ශ්‍රී ලංකාවේ සිරගතව සිටි කාලය තුළ දුෂ්කර තත්ත්වයන්ට මුහුණ දී නැවත පාකිස්ථානයට පැමිණීම ගැන තමා සතුටු වන බව තවත් අයකු පවසා තිබේ.

පාකිස්ථාන සිරකරුවන් ආපසු පැමිණීම සම්බන්ධයෙන් ප්‍රතිචාර දක්වමින් පාකිස්ථාන අභ්‍යන්තර කටයුතු ඇමැති නක්වි කියා සිටියේ ඔවුන් නැවත ගෙන්වා ගැනීම සඳහා ශ්‍රී ලංකා රජය සහ මහ කොමසාරිස්වරයාගේ කාර්යභාරය පිළිබඳ තමා ස්තූතිවන්ත වන බවයි.

සහාය දැක්වීමක් ලෙස සිරකරුවන්ගේ වියදම් දැරීමට දැක්වූ ත්‍යාගශීලීභාවය ගැන ඔහු පාකිස්ථානයේ පෞද්ගලීකරණය පිළිබඳ ෆෙඩරල් ඇමැති අබ්දුල් අලීම් ඛාන්ට ස්තූති කළේය.

පකිස්ථානු ජාතිකයන් නිදහස් කිරීමට සහ ආරක්ෂිතව ආපසු පැමිණීමට පහසුකම් සැලසීම අභ්‍යන්තර කටයුතු අමාත්‍යාංශයට පවරා ඇති බව වාර්තා වේ.

මෙම පාකිස්ථාන සිරකරුවන් 56 දෙනා ආපසු පැමිණීම රජයේ සැළකිව යුතු මානුෂීය ප්‍රයත්නයක් සනිටුහන් කරන අතර ඔවුන්ගේ ආදරණීයයන් නැවත පැමිණෙන තෙක් බලා සිටින පවුල්වලට සහනයක් ගෙන එනු ඇතැයි විශ්වාස කෙරේ.