විහාරස්ථානයකින් පෞරාණික වටිනාකමක් ඇති බුද්ධ ප්‍රතිමාවක් සොරකම් කිරීම සම්බන්ධයෙන් මාවතගම පොලිසිය විසින් සැකකරුවන් 14 දෙනෙකු අත්අඩංගුවට ගෙන තිබේ.

මාවතගම පොලිස් වසම තුළ පිහිටි කැබිලිතිගොඩ පුරාණ රජමහා විහාරයේ ආවාස ගෙයි තැන්පත් කර තිබූ බුද්ධ ප්‍රතිමාවක් සොරකම් කර ඇති බවට 2026 ජනවාරි 28 වැනිදා ලැබුණු තොරතුරක් මත පොලිසිය විමර්ශනයක් ආරම්භ කළේය.

අපරාධ පරීක්ෂණ දෙපාර්තමේන්තුවේ නිලධාරීන් බව කියාගත් පුද්ගලයන් සිව්දෙනෙකු සිද්ධිය වූ දින රාත්‍රියේ විහාරස්ථානයට ගොස් පරීක්ෂණයක් සඳහා අවශ්‍ය බව පවසමින් අඩි 1 1/2ක් උස රන් බුද්ධ ප්‍රතිමාව සොරකම් කර ඇති බව විමර්ශනවලින් හෙළිවී තිබේ.

වැඩිදුර පරීක්ෂණවලින් පසුව, සිද්ධිය සම්බන්ධයෙන් සැකකරුවන් 14 දෙනෙකු ඊයේ (31) අත්අඩංගුවට ගත් බව මාවතගම පොලිසිය පැවසීය.

සොරකම් කරන ලද බුද්ධ ප්‍රතිමාව සහ සැකකරුවන් භාවිත කළ බව කියන වෑන් රථ දෙකක් සොයා ගෙන ඇත.

අත්අඩංගුවට ගත් පුද්ගලයන් මිණිගමුව, තෙල්දෙණිය, මොනරාගල, මතුගම, මාතලේ සහ රිදීගම යන ප්‍රදේශවල පදිංචිකරුවන් වන අතර ඔවුන් වයස අවුරුදු 22ත් 56ත් අතර වයස්වල පසුවන බව පොලිසිය පවසයි.

සැකකරුවන් පිලැස්ස මහේස්ත්‍රාත්වරයා හමුවට ඉදිරිපත් කර 2026 පෙබරවාරි 13 වැනිදා දක්වා රක්ෂිත බන්ධනාගාර ගත කරන ලදී.

සිද්ධිය සම්බන්ධයෙන් මාවතගම පොලිසිය වැඩිදුර පරීක්ෂණ පවත්වයි.