නොවැම්බර් මාසයේ පැවති නගරාධිපති මැතිවරණයෙන් විශිෂ්ට ජයග්‍රහණයක් ලැබූ 34 හැවිරිදි සොහ්රාන් මම්දානි, නිව්යෝර්ක්හි උමං දුම්රිය ස්ථානයක මධ්‍යම රාත්‍රියේ පැවති උත්සවයකදී නිල වශයෙන් දිවුරුම් දුන්නේය.

“නිව්යෝර්ක්හි ජනතාවට සවන් දීම වටා අපගේ ව්‍යාපාරය ගොඩනගා තිබෙනවා. අපි ඒ ආකාරයෙන්ම පාලනයත් කරනවා,හෙට, අපි වැඩට බහිමු.” යනුවෙන් මම්දානි උත්සවයට පෙර X හි සටහන් කර තිබිණි.

මම්දානිගේ දිවුරුම් දීම සනිටුහන් කිරීම සඳහා සැලසුම් කර ඇති උත්සව දෙකෙන් පළමුවැන්න පෞද්ගලික, භූගත උමං දුම්රිය ස්ථානයක දිවුරුම වූ අතර, නගර ශාලාවෙන් පිටත මහජන සාදයකට දහස් ගණනක් ආකර්ෂණය වනු ඇතැයි අපේක්ෂා කෙරේ.

නිව්යෝර්ක්හි, මැතිවරණයෙන් පසු ජනවාරි 1 වැනිදා නගරාධිපති ධුර කාලය ආරම්භ වේ.

අමෙරිකාවේ වඩාත්ම ජනාකීර්ණ නගරය අධීක්ෂණය කරන්නේ කවුරුන්ද යන්න පිළිබඳ කිසිදු අපැහැදිලි බවක් වළක්වා ගැනීම සඳහා, මධ්‍යම රාත්‍රියේ කුඩා දිවුරුම් දීමක් පැවැත්වීම සම්ප්‍රදායක් බවට පත්ව ඇත.

මම්දානි තම දිවුරුම් දීමේ ස්ථානය ලෙස පැරණි නගර ශාලාවේ උමං මාර්ග නැවතුම තෝරා ගත්තේය.

මෙම දුම්රිය ස්ථානය 1945 දී ඉවත් කරන ලද අතර මාර්ගෝපදේශක චාරිකා හරහා වසරකට කිහිපවතාවක් පමණක් ප්‍රවේශ විය හැකිය.

තවදුරටත් භාවිතයේ නොමැති වුවද, දුම්රිය ස්ථානයට ටයිල් කළ ආරුක්කු සහිත විශ්මයජනක ගෘහ නිර්මාණ ශිල්පයක් ඇත.

නිව්යෝර්ක් ජනතාවගේ ජීවිත වැඩිදියුණු කිරීමට යටිතල පහසුකම් සඳහා ආයෝජනය කළ යුගයක් මෙම දුම්රිය ස්ථානය නියෝජනය කරන බව මම්දානි පැවසීය.

එය ඔහුගේ පරිපාලනය ඉදිරියට ගෙන යෑමට ඉලක්ක කළ අභිලාෂය බව ඔහු පැවසීය.

මම්දානි නගරයේ පළමු මුස්ලිම් නගරාධිපතිවරයා වේ.

මධ්‍යම රාත්‍රියේ පැවති උත්සවයේදී, මම්දානි දිවුරුම් දෙන විට කුරානයේ පිටපතක් මත අත තැබූ අතර, නිව්යෝර්ක් නගරාධිපතිවරයකු දිවුරුම්දීම සඳහා ඉස්ලාමයේ ශුද්ධ පාඨය භාවිත කළ පළමු අවස්ථාව ද සනිටුහන් කළේය.

දෙවැනි දිවුරුම් දීමේ උත්සවයේදී ද කුරානය භාවිත කරනු ඇත.

ජනාධිපති ඩොනල්ඩ් ට්‍රම්ප්ගේ දේශපාලන එදිරිවාදියකු වන නිව්යෝර්ක් නීතිපති ලෙටිටියා ජේම්ස් දිවුරුම් දීම අධීක්ෂණය කළාය.

සිරකූස් විශ්වවිද්‍යාලයේ දේශපාලන විද්‍යා මහාචාර්ය ග්‍රාන්ට් රීහර් පැවසුවේ දිවුරුම් දීමේදී ජේම්ස්ගේ භූමිකාව හරහා මම්දානි ජනාධිපතිවරයාගෙන් ස්වාධීන වීමට යන බවට ප්‍රධාන ආධාරකරුවන්ට පණිවිඩයක් යැවූ බවයි.