පසුගිය මාස 12 තුළ ජනාධිපති අනුර කුමාර දිසානායක දේශීය වශයෙන් සිදු කළ සංචාර සහ නවාතැන් වියදම් සම්බන්ධයෙන් තොරතුරු දැනගැනීමේ අයිතිවාසිකම් (RTI) පනත යටතේ ඉල්ලා සිටි තොරතුරු ප්‍රතික්ෂේප කිරීමට තොරතුරු නිලධාරියා ගත් තීරණයට එරෙහිව යූ ටියුබ්කරුවකු ජනාධිපති ලේකම් කාර්යාලයේ ඒ සඳහා නම් කර සිටින නිලධාරියා වෙත අභියාචනයක් ඉදිරිපත් කර තිබේ.

ජනාධිපතිවරයාගේ දේශීය සංචාර සහ නවාතැන් වියදම් පිළිබඳ තොරතුරු නැවත සළකා බලා නිකුත් කරන ලෙස යූ ටියුබ්කරුවකු වන ජනිත් ප්‍රේමරත්න සිය අභියාචනයේදී බලධාරීන්ගෙන් ඉල්ලා සිටියේය.

ඔහු ප්‍රකාශ කළේ තම ඉල්ලීම මෙහෙයුම් හෝ ආරක්ෂක සංවේදී තොරතුරු හෙළි නොකරන මුළු පිරිවැය, එකතු කළ මුදල් සහ සංචාර/ස්ථාන වැනි මූල්‍ය වියදම් දත්තවලට සීමා වී ඇති බවයි.

එවැනි වියදම් හෙළිදරව් කිරීම තොරතුරු දැනගැනීමේ අයිතිවාසිකම් පනතට පාදක වන විනිවිදභාවයේ මූලධර්මයට අනුකූල වන බවත් ආරක්ෂාවට හානියක් නොවන බවත් ඔහු පැවසීය.

“මහජන අරමුදල් භාවිත කරන ආකාරය පිළිබඳ දත්ත සඳහා වගවීමේදී මහජන ප්‍රවේශය අත්‍යවශ්‍ය වේ,” යනුවෙන් ඔහු සිය අභියාචනයේ සඳහන් කළේය.

2025 අගෝස්තු 27 දිනැති ලිපියකින්, ජනාධිපති ලේකම් කාර්යාලයේ තොරතුරු නිලධාරියා යූටියුබ්කරුට දන්වා සිටියේ, ඉල්ලා සිටින ලද තොරතුරු ජනාධිපතිවරයා සම්බන්ධ ආරක්ෂක සංවේදී කරුණුවලට සෘජුවම සම්බන්ධ වී ඇති නිසා තොරතුරු දැනගැනීමේ අයිතිවාසිකම් පනතේ 5(1)(b)(i) වගන්තිය යටතේ ඉල්ලීම ප්‍රතික්ෂේප කරන බවයි.

තොරතුරු නිලධාරියාගේ තීරණයට එරෙහිව තොරතුරු දැනගැනීමේ අයිතිවාසිකම් පනතේ 31(1) වගන්තිය යටතේ යූටියුබ්කරු මෙම අභියාචනය ගොනු කර ඇත.