ලෝක බැංකුව විසින් ක්‍රියාත්මක කරන සාමාන්‍ය අධ්‍යාපන නවීකරණ ව්‍යාපෘතිය හරහා ඩොලර් මිලියන 50ක නව අතිරේක මූල්‍යකරණ පැකේජයක් ශ්‍රී ලංකාවට අනුමත කර තිබේ.

එමගින් රට පුරා සිසුන් 500,000ක් සහ ගුරුවරුන් 150,000ක් ප්‍රතිලාභ ලබනු ඇත.

මෙම අතිරේක අරමුදල් මගින් අත්‍යවශ්‍ය අධ්‍යාපන ප්‍රතිසංස්කරණ නිසි පරිදි පවත්වා ගැනීමට, ඉගැන්වීමේ ගුණාත්මකභාවය වැඩිදියුණු කිරීමට, පාසල් පහසුකම් වැඩිදියුණු කිරීමට සහ සිසුන්ගේ යහපැවැත්ම වැඩිදියුණු කිරීමට උපකාරී වනු ඇති අතර, වතුකරයේ ප්‍රජාවන් සහ විශේෂ අවශ්‍යතා ඇති දරුවන්ට සහාය වන පාසල් ඇතුළුව ඌන සේවා ලත් පාසල් කෙරෙහි දැඩි අවධානයක් යොමු කෙරේ.

ශ්‍රේණි මට්ටම නොසළකා පළාත් නවයේම පාසල් මෙමගින් ප්‍රතිලාභ ලබනු ඇතැයි අපේක්ෂා කෙරේ.

“මෙම සහයෝගය ශ්‍රී ලංකාවේ සෑම දරුවකුටම ආරක්ෂිත පරිසරයක ඉගෙනීමට අවස්ථාව ලබා දෙන බවත්, සෑම ගුරුවරයකුටම තම සිසුන්ගේ දියුණුවට උපකාර කිරීමට අවශ්‍ය මෙවලම් ඇති බවත් සහතික කිරීම සඳහායි,” මාලදිවයින, නේපාලය සහ ශ්‍රී ලංකාව සඳහා ලෝක බැංකු අංශ අධ්‍යක්ෂ ඩේවිඩ් සිස්ලන් පැවසීය.

“සිසුන්ට සහ ගුරුවරුන්ට ඔවුන්ගේ සම්පූර්ණ හැකියාවන් කරා ළඟා වීමට උපකාර කිරීම සඳහා ශ්‍රී ලංකාව සමඟ කටයුතු කිරීමට ලැබීම ගැන අපි සතුටු වෙනවා,” යැයි ඔහු පැවසීය.

අතිරේක මූල්‍යකරණය මඟින් ගුරු අධ්‍යාපනය නවීකරණය කිරීම සහ ඩිජිටල් ඉගෙනීම කෙරෙහි දැඩි අවධානයක් යොමු කරමින් අඛණ්ඩ ගුරු සංවර්ධනය මගින් ගුරු කාර්යක්ෂමතාව වැඩිදියුණු කිරීමට සහාය වනු ඇත.

එසේම මේ යටතේ පාසල් සෞඛ්‍ය සහ පෝෂණ වැඩසටහනකට සහාය වීමෙන් පාසල් සෞඛ්‍ය සහ යහපැවැත්ම ශක්තිමත් කරනු ඇත.

එමගින් පිරිසිදු ජලය සහ සනීපාරක්ෂාව සඳහා ප්‍රවේශය වැඩි දියුණු කරන අතර ඔසප් සනීපාරක්ෂාව සහ ප්‍රජනක සෞඛ්‍යය ප්‍රවර්ධනය කිරීමට සහ පාසල්වල මානසික සෞඛ්‍ය සහයෝගය වැඩි කිරීමට කටයුතු කෙරෙනු ඇත.

“අමතර අරමුදල් ග්‍රාමීය සහ වතු ප්‍රදේශවල දරුවන්ට ප්‍රතිලාභ සැලසීම සඳහා යොදා ගනු ලබන අතර, විශේෂයෙන් ශිෂ්‍යාවන් කෙරෙහි අවධානය යොමු කෙරෙනවා,” ලෝක බැංකු ප්‍රධාන ආර්ථික විද්‍යාඥ සහ කාර්ය කණ්ඩායම් නායක හර්ෂ අතුරූපනේ පැවසීය.

මෙම ව්‍යාපෘතිය අධ්‍යාපන අමාත්‍යාංශය සහ පළාත් අධ්‍යාපන අධිකාරීන් විසින් ක්‍රියාත්මක කරනු ලැබේ.