ලබන 30 වැනිදා ආරම්භ වන 2025 ICC කාන්තා ක්‍රිකට් ලෝක කුසලානයේ දී පිරිනමන ත්‍යාග මුදලේ දැවැන්ත වැඩිවීමක් අන්තර්ජාතික ක්‍රිකට් කවුන්සිලය නිවේදනය කර තිබේ.

තරඟාවලිය ඉන්දියාවේ දී සහ ශ්‍රී ලංකාවේ දී පැවැත්වීමට නියමිතය.

කණ්ඩායම් අටකින් සමන්විත මෙවර තරඟාවලියේ සමස්ත ත්‍යාග මුදල ඩොලර් මිලියන 13.88ක් බව අන්තර්ජාතික ක්‍රිකට් කවුන්සිලය පවසයි.

එය 2022 දී නවසීලන්තයේ පැවති අවසන් තරඟාවලියේ දී දුන් ත්‍යාග මුදල වන ඩොලර් මිලියන 3.5 සිට සියයට 297ක දැවැන්ත වැඩිවීමකි.

මුළු ත්‍යාග මුදල වසර දෙකකට පෙර ඉන්දියාවේ පැවති ICC පිරිමි ක්‍රිකට් ලෝක කුසලානයේ මුළු ත්‍යාග මුදල ඉක්මවා යන අතර එහි මුළු ත්‍යාග මුදල ඩොලර් මිලියන 10ක් විය.

කාන්තා ක්‍රිකට් ක්‍රීඩාවේ වර්ධනය පුළුල් කිරීම සඳහා වන අන්තර්ජාතික ක්‍රිකට් කවුන්සිල උපාය මාර්ගයට අනුව මෙම වෙනස සිදුකර තිබේ.

වැටුප් සමානාත්මතාව හඳුන්වා දීමේ තීරණය 2024 ICC කාන්තා T20 ලෝක කුසලානයට පෙර ප්‍රකාශයට පත් කරන ලදී.

ඒ අනුව කාන්තා ක්‍රිකට් ලෝක කුසලානයේ 13 වැනි තරගාවලියේ ජයග්‍රාහකයන්ට ඩොලර් මිලියන 4.48ක ත්‍යාග මුදලක් ලැබෙනු ඇත.

එය 2022 දී ඕස්ට්‍රේලියාවට පිරිනමන ලද ඩොලර් මිලියන 1.32ට වඩා සියයට 239ක වැඩිවීමකි.

මේ අතර, අනුශූරතාවට ඩොලර් මිලියන 2.24ක් ලැබෙනු ඇති අතර එය වසර තුනකට පෙර එංගලන්තය දිනාගත් ඩොලර් 600,000ට සාපේක්ෂව සියයට 273ක වැඩිවීමකි.

පරාජිත අවසන් පූර්ව වටයට සුදුසුකම් ලැබූ දෙදෙනාටම ඩොලර් මිලියන 1.12ක් (2022 දී ඩොලර් 300,000ක් විය) ලැබෙනු ඇත.

කණ්ඩායම් අදියරේ සෑම සහභාගිවන්නෙකුටම ඩොලර් 250,000ක් උපයා ගැනීමට හැකි වන අතර කණ්ඩායම් අදියරේ සෑම ජයග්‍රහණයකදීම ජයග්‍රාහකයන්ට ඩොලර් 34,314ක් ලැබෙනු ඇත.

අවසන් වගුවේ දෙවැනි භාගයේදී, පස්වැනි සහ හයවැනි ස්ථාන ලබා ගන්නා කණ්ඩායම් ඩොලර් 700,000 බැගින් ලැබෙන අතර හත්වැනි සහ අටවැනි ස්ථාන ලබා ගන්නා කණ්ඩායම් ඩොලර් 280,000ක් උපයනු ඇත.

අන්තර්ජාතික ක්‍රිකට් කවුන්සිල සභාපති ජේ ෂා පවසන්නේ මෙම නිවේදනය කාන්තා ක්‍රිකට් ගමනේ සන්ධිස්ථානයක් සනිටුහන් කරන බවයි.

“සිව් ගුණයකින් ත්‍යාග මුදල වැඩිවීම කාන්තා ක්‍රිකට් සඳහා සන්ධිස්ථානයක්. කාන්තා ක්‍රිකට් සඳහා අපගේ පැහැදිලි කැපවීම එමගින් පිළිබිඹු වනවා. අපගේ පණිවිඩය සරලයි, කාන්තා ක්‍රිකට් ක්‍රීඩිකාවන් මෙම ක්‍රීඩාව වෘත්තීයමය වශයෙන් තෝරා ගන්නේ නම් පිරිමින්ට සමානව සළකනු ලබන බව දැන සිටිය යුතුයි.

ලෝක මට්ටමේ ICC කාන්තා ක්‍රිකට් ලෝක කුසලානයක් ලබා දීමට සහ ඊළඟ පරම්පරාවේ ක්‍රීඩිකාවන් සහ රසිකයන් දිරිමත් කිරීමට අපගේ ඇති කැමැත්ත මෙම ඉහළ නැංවීම මගින් අවධාරණය කෙරෙනවා” යැයි ඔහු පැවසීය.