May 26, 2025
ඊශ්රායලය, ඉන්දියාව, රුසියාව සහ යුක්රේනය වැනි රටවලින් පැමිණෙන විදේශිකයන්, ප්රධාන වශයෙන් ශ්රී ලංකා සංචාරක සංවර්ධන අධිකාරිය විසින් නියම කර ඇති මාර්ගෝපදේශ උල්ලංඝනය කරමින්, නිකුත් කරන ලද වීසා භාවිත කරමින් ව්යාපාරික මෙහෙයුම් සහ රැකියාවලට සම්බන්ධ වෙමින් සිටින බව වාර්තා වේ.
සංචාරක අමාත්යාංශයේ නිලධාරියකු උපුටා දක්වමින් ‘ඩේලි මිරර්’ වාර්තා කර ඇත්තේ, සංචාරක හෝ ආගන්තුක සත්කාර කර්මාන්තයේ ආයෝජන සහ රැකියා සඳහා ශ්රී ලංකාවට පැමිණෙන විදේශිකයන් සඳහා වීසා නිකුත් කිරීමේදී අනුගමනය කළ යුතු දැඩි මාර්ගෝපදේශ මාලාවක් සංචාරක සංවර්ධන අධිකාරිය විසින් නියම කර ඇති බවයි.
සූපවේදීන්, කළමනාකරුවන් සහ චිකිත්සකයින් වැනි කාණ්ඩවල ආගන්තුක සත්කාර කර්මාන්තයේ සේවය කිරීම සඳහා විදේශීය ජාතිකයන්ට වීසා නිර්දේශ කරනු ලබන්නේ සංචාරක සංවර්ධන අධිකාරිය විසිනි.
“සංචාරක සංවර්ධන අධිකාරිය විසින් නිර්දේශ කරනු ලබන්නේ ආගමන බලධාරීන් විසින්. යම් ප්රමිතියකට වඩා ඉහළ හෝටල් සහ අවන්හල් සඳහා පමණක් විදේශීය ජාතිකයන් සේවයේ යෙදවීමට අවසර තිබෙනවා. එහෙත් විදේශිකයන් කුඩා අවන්හල්වල පවා රැකියා කරන බව අපට පෙනෙනවා. ඔවුන්ගේ සේවායෝජකයන්, කලින් පැමිණි හොඳින් ස්ථාපිත විදේශිකයන්, සංචාරක සංවර්ධන අධිකාරියේ මාර්ගෝපදේශ මඟහරිමින් ආගමන බලධාරීන්ගෙන් තම සේවකයන් සඳහා වීසා ලබාගන්නවා” යැයි ඔහු පවසා ඇත.
තවද, විදේශීය ජාතිකයකු සංචාරක සංවර්ධන බද්ද ගෙවිය යුතු අතර, ඔහු හෝ ඇය කර්මාන්තයේ ආයෝජනය කිරීමට කැමති නම්, අනෙකුත් මාර්ගෝපදේශ සපුරාලීමට අමතරව IRA (අන්තර්ජාතික නේවාසික ගිණුම) හි අවශ්ය තැන්පතුව පවත්වා ගත යුතුය.
අදාළ නිලධාරියා වැඩිදුරටත් පවසන්නේ, එවැනි විදේශීය ජාතිකයන් නීති රීති උල්ලංඝනය කරමින් වසරක නේවාසික වීසා බලපත්රයක් ලබාගෙන ඇති අවස්ථා පවතින බවයි.
“ආගමන නිලධාරීන්ගේ සහාය ඇතිව ඔවුන්ට එය කළ හැකියි. මෙය වසර ගණනාවක් තිස්සේ අඛණ්ඩව සිදුවෙනවා. දැන් අපි වීසා සැකසීමේදී දූෂණයට තුඩු දෙන හිඩැස් ඉවත් කිරීමට පියවර ගනිමින් සිටිනවා” ඔහු සඳහන් කරයි.
මෙම විදේශීය ජාතිකයන් සංචාරකයන් ලෙස පැමිණෙන ඔවුන්ගේ රටවල සෙසු පුද්ගලයන්ට සේවා සපයයි.
එසේම ශ්රී ලංකාවට ලැබිය යුතු ආර්ථික ප්රතිලාභ මගහරිමින් ඔවුන්ගේ විද්යුත් ගනුදෙනු ක්රම භාවිත කරමින් ගෙවීම් සිදුකරනු ලබන බවද වාර්තා වේ.
මේ සම්බන්ධයෙන් මහජන ආරක්ෂක අමාත්ය ආනන්ද විජේපාල පවසා ඇත්තේ, වීසා රෙගුලාසි උල්ලංඝනය කළහොත් විදේශිකයන් පිටුවහල් කරන බවයි.
“මේ සම්බන්ධයෙන් අපි පියවර වේගවත් කරනවා” ඔහු පවසයි.
